పల్నాడులో వీరుల ఆరాధనోత్సవాలు

గుంటూరు జిల్లా పల్నాడులో వీరుల ఆరాధనోత్సవాలు ప్రారంభమయ్యాయి. ఏటా కార్తికమాసంలో అమావాస్య రాత్రి ప్రారంభమయ్యే ఉత్సవాలు 5రోజుల పాటు జరుగుతాయి. వీరుల దేవాలయం వద్ద పిడుగు వంశీయులకు చెందిన పీఠాధిపతి ఎర్రజెండా ఎగురవేసి ఉత్సవాలను ఆరంభించారు. తొలిరోజు రాచగావు పూర్తికాగా... 14న రాయభారం, 15న మందపోరు కార్యక్రమాన్ని నిర్వహిస్తారు. కుల, మతాలకు అతీతంగా బ్రహ్మనాయుడు ప్రవేశపెట్టిన చాపకూడును కరోనా ప్రభావం వల్ల నిర్వహించడం లేదు. కేవలం ఆచారవంతులు మొక్కులు తీర్చుకుంటారు. 16న కోడిపోరు, 17న కల్లిపాడు ఉత్సవాలు జరగనున్నాయి. ఆనాటి యుద్ధంలో అసువులు బాసిన వీరులకు నివాళులు అర్పించేందుకు రాష్ట్రవ్యాప్తంగా వివిధ ప్రాంతాల నుంచి ఆచారవంతులు తరలివస్తున్నారు. కాని కరోనా ప్రభావం వల్ల ఉత్సవాలు నిరాడంబరంగా జరుగుతున్నాయి. ఈ నేపథ్యంలో 1182లో గుంటూరు జిల్లా కారంపూడి వేదికగా పల్నాటి సమరం.. అమావాస్య రోజే ఉత్సవాలు జరగటానికి గల కారణాల గురించి మరిన్ని విషయాలు..!

పౌరుషాల పురిటిగడ్డ పల్నాటి సీమ. నాటి రణ క్షేత్రమైన కార్యమపూడి, ప్రస్తుతం కారంపూడి. అక్కడ జరిగిన యుద్ధంలో అసువులు బాసిన వీరులను స్మరించుకుంటూ జరిపే ఉత్సవాలే పల్నాటి వీరుల ఆరాధనోత్సవాలు. ఆంధ్రప్రదేశ్​లోని గుంటూరు జిల్లా కారంపూడిలో ఇవి 5రోజుల పాటు జరుగుతాయి. కార్తిక పౌర్ణమి రోజు పోతురాజుకు పాడిగాం కట్టి ఉత్సవాలకు అంకురార్పణ చేస్తారు. అనంతరం కార్తిక అమావాస్య రోజున ఉత్సవాలను ప్రారంభిస్తారు. ప్రతి ఏటా రచగావు, రాయబారం, మందపోరు, కోడిపోరు, కల్లిపాడు అనే పేర్లతో ఉత్సవాలు ఘనంగా జరుగుతాయి.

దాయాదుల మధ్య వైరం..

అనుగురాజు మొదటి భార్య సంతానమైన నలగామరాజు గురజాల రాజ్యాన్ని.. రెండవ భార్య సంతానమైన మలిదేవులకు మాచర్ల రాజ్యాన్ని పాలించారు. మాచర్ల రాజ్యానికి మంత్రిగా బ్రహ్మనాయుడు.. గురజాల రాజ్యానికి నాగమ్మ మంత్రిగా పనిచేశారు. నాగమ్మ పన్నిన కుట్రలు, కుతంత్రాలు బ్రహ్మనాయుడుని వనవాసం చేయించాయని చరిత్ర చెబుతోంది. వైష్ణవం ద్వారా ప్రజలలో సమసమాజ స్థాపనకు బ్రహ్మన్న సుస్థిర స్థానం పొందాడు. శైవమతాన్ని ప్రబోధిస్తూ నాగమ్మ పల్నాడులో ముఖ్య స్థానం సంపాదించింది. కోడిపోరుతో మలిదేవులకు, నలగామునికి మధ్య వైరం ప్రారంభమయ్యింది. వారి మధ్య సంధి కుదిర్చేందుకు వెళ్లిన వ్యక్తి హత్యకు గురవ్వటంతో గురజాల, మాచర్ల రాజ్యాల మధ్య వైరం మరింత పెరిగి 1182లో పల్నాటి యుద్ధానికి దారితీసింది.

మంత్రుల మధ్య పోరు

రాజుల మధ్య దాయాదుల పోరు.. మంత్రుల మధ్య వైష్ణ, శైవ మతాల పోరు.. పల్నాటి యుద్దానికి అంకురార్పణగా చెప్పవచ్చు. కులమతాలకు అతీతంగా మాచర్ల రాజ్యాన్ని బ్రహ్మనాయుడు కాపాడుతుంటే.. కుట్రలు కుతంత్రాలతో మాచర్ల రాజ్యాన్ని చేజిక్కించుకునేందుకు గురజాల రాజ్యాం ప్రయత్నిచింది. కుల మతాలకు అతీతంగా బ్రహ్మనాయుడు సమసమాజ స్థాపనకు చాపకూడును ఏర్పాటు చేయటమే కాకుండా.. దళితుడైన కన్నమదాసును దత్తపుత్రునిగా స్వీకరించి ఒక వీరుడిగా తయారుచేసిన ఘనత దక్కించుకున్నాడు. ఇది జీర్ణించుకోలేని నాగమ్మ గురజాల, మాచర్ల రాజ్యాల మధ్య రాగద్వేషాలను పెంపొందించేది. అదే యుద్ధానికి మరింత ఆజ్యం పోసింది.

కార్తిక అమావాస్య రోజే ఉత్సవాలు ఎందుకు?

పల్నాటి యుద్ధం కార్తిక అమావాస్య నుంచి ఐదు రోజుల పాటు జరిగిందని వీరాచారాపీఠం తెలుపుతోంది. అందుకే పల్నాటి వీరారాధన ఉత్సవాలు కార్తిక అమావాస్య రోజునే జరుగుతాయి. కారంపూడికి ఒక ఘనమైన చరిత్ర ఉంది. యుద్ధంలో వీరులుగా నిలిచిన అమరులను స్మరించుకునేందుకు వీర్లదేవాలయం నిర్మించారని చరిత్ర చెబుతోంది. వీరుల ఉత్సవాల బాధ్యతను పిడుగు వంశం వారికి సాక్షాత్తు బ్రహ్మనాయుడే అప్పగించినట్లు చరిత్ర ద్వారా తెలుస్తోంది. మహాభారతాన్ని తలపించేదే పల్నాటి చరిత్ర. ఈ యుద్దానికి అనేక కారణాలు ఉన్నాయి.

చరిత్రను పదిలపరచాలి..

ప్రతి ఏటా ఎంతో వైభవంగా పల్నాటి ఉత్సవాలు జరుగుతాయి. కానీ ప్రస్తుతం కరోనా కారణంగా కొన్ని మినహాయింపులతో ఉత్సవాలను నిర్వహించేందుకు అధికారులు నిర్ణయించారు. ప్రభుత్వ నిర్ణయాన్ని పల్నాటి వీరాచారాపీఠం, పీఠాధిపతి పిడుగు తరుణ్ చెన్నకేశవ ఒప్పుకోవటంతో కార్తీక అమావాస్య రోజున ఉత్సవాలు రాచగావుతో ప్రారంభమయ్యాయి. చరిత్ర ఘనంగా ఉన్నా అభివృద్ధి శూన్యం అన్నట్లుగా.. ఎంతమంది పాలకులు మారినా వీర్ల దేవాలయం మాత్రం ఇప్పటికీ శిథిలావస్థలోనే కనపడుతోంది. పల్నాటి ప్రాభవం భావితరాలకు తెలియాలంటే ఎంతో చారిత్రక ప్రాభవమున్న ఈ ప్రాంతాన్ని, చరిత్రను ప్రభుత్వం పదిలపర్చాల్సిన అవసరముందని స్థానికులు కోరుతున్నారు.

ఇదీ చదవండి: కాపుల్ని బీసీల్లో చేర్చడం కుదరదు: పేర్ని నాని