High Court : అమరావతి రాజధాని పరిధిలో స్థానికేతరులకు ఇళ్ల స్థలాల పంపిణీపై ప్రభుత్వం జీవో జారీ చేసిన సంగతి తెలిసిందే. దీనిని సవాల్ చేస్తూ రాజధాని రైతులు దాఖలు చేసిన పిటిషన్లపై హైకోర్టు విచారణ జరిపింది. తదుపరి విచారణను రేపటికి వాయిదా వేసింది. రాజధానిలో నిర్మించిన టిడ్కో ఇళ్లను లబ్ధిదారులకు అందజేయకుండా.. ఇళ్ల పట్టాల పంపిణీపై ప్రభుత్వానికి తొందర ఎందుకని పిటిషనర్లు అభ్యంతరం లేవనెత్తుతున్నారని ప్రభుత్వాన్ని హైకోర్టు ప్రశ్నించింది. టిడ్కో ఇళ్ల వ్యవహారంలో ప్రభుత్వం, పిటిషనర్లు ఎలాంటి వివరాలు అందజేయలేదని తెలిపింది.
"టిడ్కో ఇళ్లపై ప్రభుత్వం, పిటిషనర్లు ఎలాంటి వివరాలు ఇవ్వలేదు. రాజధాని ప్రాంతంలో 5 వేల టిడ్కో ఇళ్ల లబ్ధిదారుల వివరాలివ్వాలి. ఇళ్ల మంజూరులో విధివిధానాలు, పూర్తి రికార్డులను కోర్టు ముందుంచాలి."-హైకోర్టు
రాజధాని ప్రాంతంలో నిర్మించిన 5000 టిడ్కో ఇళ్ల లబ్ధిదారుల వివరాలు, ఇళ్ల మంజూరుకు అనుసరించిన విధివిధానాలు, పూర్తి రికార్డులను న్యాయస్థానం ముందు ఉంచాలని ప్రభుత్వాన్ని ఆదేశించింది. తదుపరి విచారణను రేపటికి వాయిదా వేసింది. మంగళవారం ఈ వ్యవహారంలో మధ్యంతర ఉత్తర్వుల అంశంపై స్పష్టత వచ్చే అవకాశముంది. రాష్ట్రంలో ఏ ప్రాంతానికి చెందిన పేదలకైనా రాజధాని అమరావతిలోని 1134 ఎకరాల్లో ఇళ్ల స్థలాలు ఇచ్చే నిమిత్తం గుంటూరు(550.65ఎకరాలు), ఎన్టీఆర్‌(583.93 ఎకరాలు) జిల్లా కలెక్టర్లకు భూ బదలాయింపు నిమిత్తం సీఆర్‌డీఏ కమిషనర్‌కు అనుమతిస్తూ పురపాలకశాఖ ప్రత్యేక ప్రధాన కార్యదర్శి వై.శ్రీలక్ష్మి ఈ ఏడాది మార్చి 31న జీవో 45 జారీ చేశారు. ఆ జీవోను సవాలు చేస్తూ రాజధాని ప్రాంత రైతులు యూ.శివయ్య, కె.రాజేష్, బెజవాడ రమేశ్‌ బాబు, ఆలూరి రాజేష్, కుర్రా బహ్మ, కట్టా రాజేంద్ర వరప్రసాద్‌ హైకోర్టులో వేర్వేరుగా వ్యాజ్యాలు దాఖలు చేశారు.
ఇవీ చదవండి:
