Warning About Summer Fires: చెట్లు పెంచితే కొండంత అండ.. వాటిని విచ్చలవిడిగా నరికేస్తే భరిచంలేనంత ఎండ..! మానవ తప్పిదాలు, ప్రకృతిలో సంభవిస్తున్న పెనుమార్పులతో.. వేసవిలో సగటు కంటే ఎక్కువగా సూర్యుడు సుర్రుమనిపిస్తున్నాడు. భానుడి ప్రతాపానికి అగ్నిప్రమాదాల సంఖ్య కూడా బాగా పెరిగిపోయింది. అందుకే ముందుజాగ్రత్తలు తప్పనిసరని.. లేకుంటే భారీ మూల్యం తప్పదని అగ్నిమాపక శాఖ అధికారులు హెచ్చరిస్తున్నారు.
వేసవికాలంలో భానుడి భగభగలకు.. తరచూ అగ్నిప్రమాదాలు జరుగుతుంటాయి. ఏమరపాటుగా ఉంటే విలువైన ఆస్తులతో పాటు ప్రాణాలు కూడా కోల్పోవాల్సి వస్తుంది. ఎండ తాపానికి రోడ్డుపై వెళుతున్న వాహనాల్లోనూ హఠాత్తుగా మంటలు రేగుతున్నాయి. అక్కడికక్కడే తగులబడిపోతున్నాయి.
ఇటీవల ఎన్టీఆర్ జిల్లా కంచికచర్ల మండలం జుజ్జూరులో.. హైవేపై వెళుతున్న లారీ క్యాబిన్ నుంచి ఒక్కసారిగా పొగలు రావటంతో డ్రైవర్ అప్రమత్తమయ్యాడు. వాహనం నుంచి దిగటంతో ప్రాణనష్టం తప్పింది. వేసవిలో ఈ తరహా ప్రమాదాలు జరిగే అవకాశాలు అధికంగా ఉన్నాయని అగ్నిమాపక శాఖ అధికారులు చెబుతున్నారు.
వేసవిలో వాహనం నడిపేటప్పుడు వైర్లను పరిశీలించాలని.. రేడియేటర్ వేడెక్కకుండా చూసుకోవాలని అగ్నిమాపకశాఖ అధికారులు సూచిస్తున్నారు. వాహనంలో ఎప్పుడూ అగ్నిమాపక పరికరాన్ని అందుబాటులో ఉంచుకోవాలని చెబుతున్నారు. గ్రామాల్లో వేసవిలో అధికంగా గడ్డి మోపులు కాలిపోతుంటాయి. షార్ట్ సర్క్యూట్ కారణంగా పట్టణాల్లో మాల్స్, గోడౌన్స్, కంపెనీల్లో అగ్నిప్రమాదాలు తరచూ జరుగుతుంటాయి.
వేసవిలో ఎప్పటికప్పుడు యంత్రాల పనితీరు తనిఖీ చేసుకుంటూ ఉండాలని అధికారులు సూచిస్తున్నారు. ఇంట్లో గ్యాస్ లీకేజీపై ప్రత్యేక దృష్టి పెట్టాల్సిన అవసరముందని అంటున్నారు. అగ్నిప్రమాదాలు జరిగినప్పుడు వెంటనే ఎలా అదుపుచేయాలో.. కర్మాగారాల్లోని ఉద్యోగులకు ప్రత్యేక శిక్షణ ఇస్తున్నట్లు తెలిపారు.
ప్రమాదంలో నష్టాన్ని నివారించాలంటే అందరికీ అవగాహనతో పాటు.. పరికరాలు అందుబాటులో ఉండాలి. ఫైరింజన్లు ప్రమాదస్థలానికి త్వరగా వచ్చే విధంగా ఉన్నతాధికారులు చర్యలు తీసుకోవాల్సిన అవసరం కూడా ఉందని నిపుణులు సూచిస్తున్నారు.
"రాష్ట్రంలో ఉష్ణోగ్రతలు.. ఏప్రిల్ నెలలోనే 40 డిగ్రీల సెల్సియస్ వస్తోంది. వచ్చే నెలలో ఇంకా పెరగచ్చు. ఉష్ణోగ్రతలు పెరిగితే.. అగ్నిప్రమాదాలు కూడా పెరుగుతాయి. ఎక్కువగా మన అజాగ్రత్త వలన ప్రమాదాలు జరగచ్చు. కొన్ని సార్లు ఒక్కసారిగా వాహనాల నుంచి మంటలు రావచ్చు.. కాబట్టి మనం కొంచం అప్రమత్తంగా ఉండాలి. అదే విధంగా తగు జాగ్రత్తలు పాటించాలి. కారు నడిపేటప్పుడు.. రేడియేటర్ని పరిశీలించుకోవాలి. ప్రస్తుతం రాష్ట్రంలోని అన్ని పరిశ్రమలలో కూడా 3 రోజుల శిక్షణను తప్పనిసరి చేశాం. పరిశ్రమలలోని సిబ్బందికి.. అగ్ని ప్రమాదాలు సమయంలో ఎలా వ్యవహరించాలో చెప్తున్నాం. పరికరాలను ఎలా వాడాలో వారితోనే చేపిస్తున్నాం". - నరేష్, అగ్నిమాపక శాఖ అధికారి
Fire Safety: సుర్రుమంటున్న సూరీడు.. అగ్నిమాపక శాఖ అధికారుల హెచ్చరికలు
ఇవీ చదవండి:
