సంగం డెయిరీ నిర్వహణలో అక్రమాలకు పాల్పడ్డారంటూ.. సంస్థ ఛైర్మన్‌, తెలుగుదేశం సీనియర్ నేత ధూళిపాళ్ల నరేంద్రను అవినీతి నిరోధక శాఖ అధికారులు అరెస్ట్ చేశారు. డెయిరీని సహకార చట్టం నుంచి మ్యాక్స్‌ చట్టం పరిధిలోకి తెచ్చే క్రమంలో.. తప్పుడు ధ్రువపత్రాలు సమర్పించారని నరేంద్రపై అభియోగాలు మోపారు. ఉదయం 7 గంటలకు నరేంద్రను అరెస్ట్ చేసినట్లు ఏసీబీ అధికారికంగా ప్రకటించింది. తెల్లవారుజామున 5 గంటలకే పొన్నూరు మండలం చింతలపూడిలోని నరేంద్ర నివాసానికి అనిశా అధికారులు.. భారీగా బలగాలను వెంటబెట్టుకుని వచ్చారు. ధూళిపాళ్ల నివాసంలో తనిఖీలు చేసిన అధికారులు.. అనంతరం నరేంద్రను అరెస్ట్ చేసి విజయవాడ తరలించారు. ఈ క్రమంలో తెలుగుదేశం కార్యకర్తలు, పోలీసులకు మధ్య తోపులాట చోటుచేసుకోగా.. ఉద్రిక్తత నెలకొంది.
ధూళిపాళ్లపై 408, 409, 418, 420, 465, 471, 120-B సెక్షన్ల కింద కేసులు నమోదు చేశారు. గతంలో సహకార శాఖ రిజిస్ట్రార్‌గా పనిచేసిన గుర్నాథంను కూడా ఈ కేసులో అనిశా అధికారులు ఒంగోలులో అరెస్ట్ చేశారు. ఇద్దరిపైనా నాన్‌ బెయిలబుల్‌ సెక్షన్ల కింద కేసు నమోదు చేసినట్లు అనిశా అధికారులు తెలిపారు. నరేంద్ర అరెస్టులో అనిశా అత్యంత గోప్యత పాటించింది. బాపట్ల నుంచి 200 మందికిపైగా పోలీసుల్ని పిలిపించి చింతలపూడిలోని నరేంద్ర నివాసంతో పాటు.. వడ్లమూడిలోని సంగం డెయిరీ, పొన్నూరులోని ఇంటి వద్ద బలగాల్ని మోహరించారు. నరేంద్ర అరెస్ట్ తర్వాత సంగం డెయిరీలోనూ తనిఖీలు చేశారు. సంస్థ ప్రధాన కార్యాలయంలోని దస్త్రాలను పరిశీలించిన అధికారులు.. అవసరమైనవాటిని స్వాధీనం చేసుకున్నారు. సంగం డెయిరీ ఎండీ గోపాలకృష్ణన్‌ను కూడా అనిశా అధికారులు అరెస్ట్ చేశారు.
ధూళిపాళ్లకు అరెస్టు నోటీసుల విషయంలో అనిశా అధికారుల పొరపాటు చేశారు. ఉదయం ఇచ్చిన నోటీసుల్లో.. పైన నరేంద్ర పేరు పెట్టి.. కింద గుర్నాథం పేరుతో అందజేశారు. తర్వాత తప్పు గ్రహించిన అధికారులు.. సరిచేసి.. మళ్లీ నరేంద్ర భార్య జ్యోతిర్మయికి అందజేశారు. సంగం డెయిరీలో ఎలాంటి అక్రమాలు జరగలేదని.. నరేంద్ర అరెస్ట్ రాజకీయకోణంలో జరిగిందేనని సంస్థ డైరెక్టర్లు ఆరోపించారు. సంతకాల ఫోర్జరీ పేరిట అరెస్ట్ దుర్మార్గమని.. తక్షణమే ఛైర్మన్‌ను విడుదల చేయాలని డిమాండ్ చేశారు.
సంగం డెయిరీని దెబ్బతీసి.. అమూల్‌కు కట్టబెట్టే కుట్రలో భాగంగానే.. నరేంద్రను అరెస్ట్ చేశారని.. తెలుగుదేశం అధినేత చంద్రబాబు ధ్వజమెత్తారు. రెండేళ్ల పాలనలో అక్రమ అరెస్టులే తప్ప.. అభివృద్ధే లేదని దుయ్యబట్టారు. కరోనా నియంత్రణలో వైఫల్యాలను పక్కదారి పట్టించడానికే తెలుగుదేశం నేతలపై కక్షసాధింపు చర్యలకు పాల్పడుతున్నారని ఆరోపించారు. ధూళిపాళ్ల ఇంటికి అంతమంది పోలీసుల్ని పంపి అరెస్ట్ చేయడానికి.. ఆయనేమైనా తీవ్రవాదా లేక ఆర్థిక ఉగ్రవాదా అని పార్టీ రాష్ట్ర అధ్యక్షుడు అచ్చెన్నాయుడు ప్రశ్నించారు. ప్రజల ప్రాణాల్ని గాలికొదిలి.. ప్రతిపక్ష నేతల అరెస్టులతో సీఎం జగన్‌ ఆనందిస్తున్నారని తెలుగుదేశం జాతీయ ప్రధాన కార్యదర్శి నారా లోకేశ్‌ ధ్వజమెత్తారు. రాజకీయాల్లో హుందాతనంతో ధూళిపాళ్ల కుటుంబం గుర్తింపు పొందిందని.. డీజీపీ సవాంగ్ నేతృత్వంలోని పోలీసులు.. వైకాపా యూనిఫాం వేసుకుని ఇలాంటి అక్రమ అరెస్టులకు పాల్పడుతున్నారని తెలుగుదేశం నేతలు విమర్శించారు.
ఇదీ చదవండి
