అయేషా మీరా రీపోస్టుమార్టం పూర్తి... నివేదికే కీలకం

అయేషామీరా హత్య కేసులో రీ పోస్ట్ మార్టం పూర్తయింది. ఐదు గంటలకు పైగా ఈ ప్రక్రియ కొనసాగింది. సీబీఐ ఎస్పీ విమల్ ఆదిత్య నేతృత్వంలో ఈ కార్యక్రమం జరిగింది. ఫోరెన్సిక్ నిపుణుల బృందం అయేషామీరా పుర్రె, ఎముకలను సేకరించి హైదరాబాద్ తీసుకెళ్లారు. ఫోరెన్సిక్ బృందం ఇచ్చే నివేదిక ఆధారంగా సీబీఐ తదుపరి విచారణ సాగనుంది.

అయేషామీరాపై అత్యాచారం, హత్య ఘటన దేశవ్యాప్తంగా సంచలనం సృష్టించింది. హత్యాచారానికి కారకులెవరో తేల్చాలన్న హైకోర్టు ఆదేశాలతో రంగంలోకి దిగింది సీబీఐ. గతంలో ఆధారాలు ధ్వంసం కావడంతో రీ పోస్టుమార్టం నిర్వహించింది. తొలుత బాధిత కుటుంబం, ముస్లిం మతపెద్దల వ్యతిరేకతతో విజయవాడ నాలుగో అదనపు చీఫ్ మెట్రోపాలిటిన్ మహిళా కోర్టు నుంచి సీబీఐ అనుమతి పొందింది. గుంటూరు జిల్లా తెనాలి చెంచుపేటలోని స్మశానవాటికలో... అయేషామీరా సమాధిని అధికారులకు ఆమె తండ్రి ఇక్బాల్ చూపించారు. ముస్లిం మతపెద్దల సమక్షంలో ఆ ప్రదేశాన్ని తవ్వారు. శనివారం ఉదయం 8 గంటల 30 నిమిషాలకు రీ పోస్ట్‌మార్టం ప్రక్రియ మొదలుపెట్టి... మధ్యాహ్నం 2 గంటల 30నిమిషాలకు ముగించారు. సీబీఐ ఎస్పీ విమల్ ఆదిత్య నేతృత్వంలో మొత్తం 15మంది అధికారులు పాల్గొన్న పోస్టుమార్టం ప్రక్రియ మొత్తాన్ని చిత్రీకరించారు.

పుర్రె, ఎముకల నమూనాల సేకరణ

అయేషామీరా మృతదేహంపై కేవలం ఒక గాయం గుర్తించినట్లు గతంలో దర్యాప్తు చేసిన పోలీసులు రూపొందించిన ఛార్జిషీట్లో నమోదు చేశారు. అలా కాకుండా ఇంకా గాయాలేమైనా ఉన్నాయా అనే కోణంలో నిపుణులు శనివారం పరిశీలించారు. పుర్రెభాగంలో గాయాలను గుర్తించి సంబంధిత ఎముకలను సేకరించారు. భుజం ఎముక, ఎడం వైపు పక్కటెముక, దవడపళ్లు రెండింటిని సేకరించి... డీఎన్​ఏ పరీక్షలకు భద్రపరిచారు. మతాచారాల ప్రకారం మిగతా అస్థిపంజరాన్ని పూడ్చివేశారు. సేకరించిన ఎముకలను ఫోరెన్సిక్ బృందం హైదరాబాద్ పంపింది. మొత్తం ప్రక్రియను చట్టపరంగా నిర్వహిస్తున్నట్లు అధికారులు తెలిపారు.

రోజా ఇప్పుడెందుకు స్పందించట్లేదు...

తమ బిడ్డను ఎవరు చంపారో తేల్చి శిక్ష పడేలా చేసేందుకు 12 ఏళ్లుగా ఎదురు చూస్తున్నామని అయేషామీరా తల్లిదండ్రులు ఆవేదన వ్యక్తం చేశారు. తమకు చట్టంపై నమ్మకం లేదని.... సీబీఐ అధికారులు నిష్పాక్షికంగా విచారణ జరపాలని కోరారు. సమాజం కోసమైనా నిందితులను పట్టుకుని శిక్షించాలని విఙ్ఞప్తి చేశారు. ప్రభుత్వానికి చిత్తశుద్ధి ఉంటే దిశ చట్టం ప్రకారం అయేషామీరా హత్య కేసు విచారణ జరిపి నిందితులను శిక్షించాలని డిమాండ్ చేశారు. గతంలో తమకు అండగా నిలబడిన వైకాపా నేత రోజా ఇపుడు అసెంబ్లీలో ఎందుకు దీనిపై మాట్లాడటం లేదని ప్రశ్నించారు. సేకరించిన ఆధారాల ప్రకారం అయేషామీరా ఎలా చనిపోయిందనేది నిర్ధరించే అవకాశాలున్నాయి. అలాగే అత్యాచారం సమయంలో ఆమెపై మత్తు మందు ప్రయోగించారా వంటి అంశాలు వెల్లడి కానున్నాయి.

ఇవీ చూడండి-చిన్నారిపై ఏడాదిగా మృగాడి అత్యాచారం.. బాలిక తల్లి ప్రోద్బలంతోనే..!