బ్లాక్ ఫంగస్ వ్యాధితో భయాందోళనలు నెలకొన్నవేళ... వారి అవసరం, కష్టాన్నే కాసులుగా మార్చుకుంటున్నారు కొందరు వ్యక్తులు. బ్లాక్ ఫంగస్ నియంత్రణలో కీలకంగా మారిన ఆంపోటెరాసిన్ బీ ఇంజెక్షన్లను నల్లబజారులో విక్రయిస్తూ ఎనిమిది మంది గుంటూరు పోలీసులకు చిక్కారు. నిందితుల నుంచి 46 అంపోటెరాసిన్ బీ ఇంజెక్షన్లను... ఇప్పటికే 64 ఇంజెక్షన్లను విక్రయించగా వచ్చిన 3 లక్షల రూపాయలను పోలీసులు స్వాధీనం చేసుకున్నారు. కేసు వివరాలను గుంటూరు రేంజ్ డీఐజీ త్రివిక్రమ్ వర్మ, అర్బన్ ఎస్పీ ఆరిఫ్ హఫీజ్ మీడియా సమావేశంలో వివరించారు.
ఈ ఇంజెక్షన్లను హోల్ సేల్ మార్కెట్లో విక్రయించే విజయవాడకు చెందిన సరఫరాదారుతో పాటు మెడికల్ రిప్రజెంటేటివ్లు ఏకమై నల్లబజారులో ఇంజెక్షన్లను విక్రయిస్తున్నట్లు డీఐజీ త్రివిక్రమ్ వర్మ చెప్పారు. గరిష్ఠ చిల్లరధర ప్రకారం 1700 రూపాయలకు లభించే అంపోటెరాసిన్ ఇంజెక్షన్లను.. నల్లబజారులో రూ.25వేల చొప్పున అమ్ముతున్నారని డీఐజీ వివరించారు. ప్రభుత్వం ఈ కీలక మందుల్ని అందుబాటులో ఉంచుతుందని.. ఎవరూ నల్లబజారులో కొనవద్దని డీఐజీ త్రివిక్రం వర్మ కోరారు.
ఇదీ చదవండి: కృష్ణా నది తీరంలో ప్రేమజంటపై దాడి.. యువతిపై అత్యాచారం!
