తూర్పుగోదావరి జిల్లా సమీపంలో ఉన్న కేంద్రపాలిత ప్రాంతం యానాంలో తొలి కరోనా పాజిటివ్ కేసు నమోదైంది. కేసు నమోదైన సమీప ప్రాంతాల్లో అధికారులు ఆంక్షలు విధించారు. కనకాలపేట గ్రామాన్ని కంటైన్మెంట్ జోన్గా ప్రకటించి రహదారులపై బారికేడ్లు ఏర్పాటు చేశారు.
- రక్షణ చర్యలు...
యానాంలో మొదటిసారిగా కరోనా కేసు బయటపడిన కారణంగా... అధికారులు రక్షణ చర్యలు చేపట్టారు. గ్రామంలో ఉన్న రహదారుల్లో అగ్నిమాపక శాఖ వాహనంతో హైపోక్లోరైడ్ ద్రావణాన్ని పిచికారీ చేశారు. గ్రామంలోని ప్రతి ఇంటికి ఆరోగ్య శాఖ సిబ్బంది వెళ్లి కోవిడ్ అనుమానిత లక్షణాలు కలిగిన వారి వివరాలు సేకరిస్తున్నారు.
పోలీస్ శాఖ 24 గంటలు బందోబస్తు నిర్వహిస్తూ ఇతరులు ఎవరు ఆ పరిసర ప్రాంతాలకు వెళ్లకుండా జాగ్రత్తలు తీసుకుంటున్నారు. కరోనా లక్షణాలు కలిగిన బాలుడి ఇంటికి పక్కన ఉన్నవారు బయటకు రాకుండా కట్టడి చేస్తున్నారు. మాస్కులు లేకుండా బయటకు వచ్చినవారికి వంద రూపాయల జరినామా విధిస్తున్నారు.
- ఆరోగ్య శాఖ మూడు నెలల నివేదిక...
ఇతర రాష్ట్రాల నుంచి వచ్చిన 2375 మందిని క్వారంటైన్ చేసినట్లు ఆరోగ్య శాఖ వెల్లడించింది. 450 మంది హోమ్ క్వారెంటైన్ చేసి... 650 మందికి కోవిడ్-19 వైద్య పరీక్షలు నిర్వహించినట్లు తమ నివేదికలో వివరించింది.
యానాం ప్రభుత్వ ఆసుపత్రిలో కరోనా బాధితులకు వైద్యం అందించేందుకు 50 పడకల ఐసోలేషన్ వార్డు, మూడు వెంటిలేటర్లు కలిగిన కోవిడ్-19 ప్రత్యేక వార్డు అందుబాటులో ఉన్నాయని... ప్రజలు భయాందోళనకు గురికావాల్సిన పనిలేదని ఆరోగ్య శాఖ మంత్రి మల్లాడి కృష్ణారావు వివరించారు. ప్రభుత్వం ప్రకటించిన మార్గదర్శకాలను తప్పక పాటించాలని డిప్యూటీ కలెక్టర్ శివరాజ్ మీనా స్పష్టం చేశారు.
ఇదీ చదవండీ...: రాష్ట్రంలో కొత్తగా 477 కరోనా పాజిటివ్ కేసులు..ఐదుగురు మృతి
