నకిలీ నగలు తనఖా పెట్టిన వ్యక్తి అరెస్ట్
చిత్తూరు సహకార టౌన్ బ్యాంకులో నకిలీ నగలను తనఖా పెట్టి రూ.80 లక్షలు రుణం తీసుకున్న కేసులో ఆ బ్యాంకు మాజీ చైర్మన్ షణ్ముగాన్ని పోలీసులు అరెస్టు చేశారు. టౌన్ బ్యాంకు తాజా మాజీ ఛైర్మన్ షణ్ముగం 2016లో 5 కిలోల నకిలీ బంగారు ఆభరణాలు టౌన్లోని దర్గా శాఖలో తనఖా పెట్టి రూ.80 లక్షల రుణం పొందినట్లు ఆ శాఖ మేనేజర్ పీఆర్ సుబ్రమణ్యం ఈ నెల 13 వ తేదీన చిత్తూరు ఒకటో పట్టణ పోలీసు స్టేషనులో ఫిర్యాదు చేశారు. అతని ఫిర్యాదు మేరకు పోలీసులు దర్యాప్తు చేపట్టారు. తన బంధువులు, అనుచరులు 14 మందితో టౌన్ బ్యాంకులో ఖాతాలు తెరిపించి 5 కిలోల నకిలీ బంగారు ఆభరణాలను 43 దఫాలుగా కుదవ పెట్టి షణ్ముగం రుణాలు పొందినట్లు చిత్తూరు డీఎస్పీ ఈశ్వర్రెడ్డి వెల్లడించారు. ఇందులో బ్యాంకు అప్రయిజర్ ధరణీ సాగర్కు కొంత నగదు ఇచ్చినట్లు వివరించారు.
