నిలిచిన సహాయ ఆచార్య పోస్టుల ఇంటర్వ్యూలు !

ఎన్జీ రంగా వ్యవసాయ విశ్వవిద్యాలయం పరిధిలో సహాయ ఆచార్యుల పోస్టుల భర్తీకి ఈనెల 29 నుంచి జులై 7 వరకూ జరగాల్సిన ఇంటర్వ్యూలు నిలిచిపోయాయి.  అధికారులు అంతా సిద్ధం చేసుకున్న తర్వాత వ్యవసాయ శాఖ కార్యదర్శి రాజశేఖర్ ఆపివేయలంటూ ఆదేశాలు జారీ చేశారు.

సహాయ ఆచార్య పోస్టుల ఇంటర్వూలు నిర్వహించాలని విశ్వవిద్యాలయ అధికారులు షెడ్యూల్ సిద్ధం చేసుకోవటంతో పాటు అభ్యర్థులకు కాల్ లెటర్లు కూడా పంపారు. ఈ సమయంలో ముఖాముఖీలు ఆపివేయాలని వ్యవసాయశాఖ ముఖ్య కార్యదర్శి రాజశేఖర్ ఆదేశాలు జారీ చేశారు. ఈ కారణంగా అధికారుల్లో గందరగోళం... అభ్యర్థుల్లో ఆందోళన నెలకొంది.

ఎన్జీ రంగా విశ్వవిద్యాలయ పరిధిలోని కేవీకేలు, కళాశాలల్లో 120 సహాయ ఆచార్యుల పోస్టుల భర్తీ కోసం గతేడాది డిసెంబర్ 29న రాతపరీక్ష నిర్వహించారు. వీరిలో 300 మంది ఇంటర్వూలకు అర్హత సాధించారు. వారికి ముఖాముఖీలు నిర్వహించాలనుకునే సరికి ఎమ్మెల్సీ ఎన్నికల కోడ్... ఆతర్వాత సార్వత్రిక ఎన్నికల కోడ్ అమల్లోకి వచ్చింది. కోడ్ ముగిసిన తర్వాత ఇంటర్వ్యూల నిర్వహణ కోసం లేఖ రాయగా... ఈనెల 17వ తేదిన వ్యవసాయశాఖ ముఖ్య కార్యదర్శి రాజశేఖర్ అనుమతి జారీ చేశారు. అధికారులు ముఖాముఖిల నిర్వహణకు ఏర్పాట్లు చేసుకున్న తరుణంలో వాటిని నిలిపేయాలని మళ్లీ ఆదేశాలు వచ్చాయి.