జగన్​కు ఆత్మీయ స్వాగతం... కేసీఆర్​కు ఆహ్వానం

వైకాపా అధినేత జగన్, పార్టీ ముఖ్యనేతలు హైదరాబాద్​లో తెలంగాణ ముఖ్యమంత్రి కేసీఆర్​ను కలిశారు. తన ప్రమాణ స్వీకార కార్యక్రమానికి రావాలని కేసీఆర్​ను జగన్ ఆహ్వానించారు. అంతకుముందు రాజ్ భవన్​లో గవర్నర్ నరసింహన్​తో భేటీ అయ్యారు.

వైకాపా అధ్యక్షుడు జగన్.. హైదరాబాద్​లో గవర్నర్ నరసింహన్.. తెలంగాణ ముఖ్యమంత్రి కేసీఆర్​ను వేర్వేరుగా కలిశారు. ప్రగతి భవన్​లో కేసీఆర్ ను సతీసమేతంగా కలిశారు. ఈ నెల 30న విజయవాడలో జరిగే తన ప్రమాణ స్వీకారోత్సవానికి రావాలని ఆహ్వానించారు. తెలుగు రాష్ట్రాల అభివృద్ధికి కలిసి పనిచేద్దామని కేసీఆర్​ను కోరారు. ఈ సందర్భంగా.. తెరాస నేతలను, మంత్రులను జగన్ కు పరిచయం చేశారు. కేసీఆర్ తో పాటు, కేటీఆర్.. జగన్ ను ఆత్మీయంగా ఆలింగనం చేసుకున్నారు.

అంతకుముందు.. బేగంపేట విమానాశ్రయానికి చేరుకున్న జగన్‌... నేరుగా రాజ్​భవన్​ వెళ్లి గవర్నర్ నరసింహన్​ను కలిశారు. ప్రభుత్వ ఏర్పాటుకు ఆహ్వానించాల్సిందిగా కోరారు. గవర్నర్‌ ​తో గంటపాటు సమావేశమయ్యారు. జగన్ రాకకు ముందే రాజ్​భవన్​కు చేరుకున్న వైకాపా కీలక నేత బొత్స సత్యనారాయణ... జగన్‌ను వైకాపా శాసనసభపక్షనేతగా ఎన్నుకున్న తీర్మానాన్ని గవర్నర్‌కు అందజేశారు. ఈ సందర్భంగా.. బేగంపేట విమానాశ్రయం, రాజ్​భవన్ వద్ద వైకాపా నేతలు, జగన్ అభిమానులు సందడి చేశారు.

హైదరాబాద్ పర్యటనలో.. జగన్ వెంట వైకాపా అగ్ర నేతలు విజయసాయిరెడ్డి, ఉమ్మారెడ్డి వెంకటేశ్వర్లు, బొత్స సత్యనారాయణ, ధర్మాన ప్రసాదరావు ఉన్నారు.

ఇదీ చదవండి...