35 కోట్ల విలువైన 10 టన్నుల వెండి పట్టివేత

తెలంగాణ రాష్ట్రం సికింద్రాబాద్ బోయిన్‌పల్లిలో భారీగా వెండి పట్టుబడింది. దాదాపు 10 టన్నుల వెండి తరలిస్తున్న కంటైనర్‌ను పోలీసులు గుర్తించారు. దాని విలువ రూ.35 కోట్లు ఉంటుందని పోలీసులు తెలిపారు. ఆదాయపన్ను శాఖాధికారులకు సమాచారమివ్వడంతో వాళ్లు కేసును దర్యాప్తు చేస్తున్నారు.

తెలంగాణ రాష్ట్రం సికింద్రాబాద్ బోయిన్​పల్లి పోలీస్ స్టేషన్ పరిధిలోని జాతీయ రహదారిపై పోలీసులు భారీగా వెండి స్వాధీనం చేసుకున్నారు. వీటిని రత్నాకర్ బ్యాంకు లిమిటెడ్​కు సరఫరా చేస్తున్నట్లు పోలీసులు గుర్తించారు. దీని విలువ 35 కోట్లకు పైగా ఉంటుందని తెలిపారు. జేపీ మార్గన్ అనే సంస్థ లండన్ నుంచి చెన్నైకి 10 టన్నులకు పైగా వెండిని చేరవేసింది. అక్కడి నుంచి చిత్తూరు మీదుగా బ్రింక్స్ సెక్యూరిటీ సంస్థ సహకారంతో రెండు కంటైనర్ల ద్వారా హైదరాబాద్​కు తీసుకొచ్చారు. మహేంద్రహిల్స్​లో ఉన్న రత్నాకర్ బ్యాంకు లిమిటెడ్​కు ఈ వెండిని చేర్చాల్సి ఉంది.

అనుమానంతో తనిఖీలు
భారీ కంటైనర్లు అక్కడికి వెళ్లడం కష్టమని ఉద్దేశంతో రెండు చిన్న చిన్న కంటైనర్లలో తరలించాలని నిర్ణయించారు. ఈ సమయంలోనే పోలీసులు వారిని గుర్తించారు. పెద్దమొత్తంలో ఉన్న వెండిని... కనీస సమాచారం లేకుండా తరలిస్తుండటాన్ని అనుమానించిన పోలీసులు వాహనాలను స్వాధీనం చేసుకున్నారు.

దర్యాప్తులో తెలుస్తుంది
ఆదాయపన్ను శాఖాధికారులకు సమాచారమివ్వడంతో వాళ్లు కేసు దర్యాప్తు చేస్తున్నారు. 10 టన్నులకు పైగా ఉన్న వెండికి సంబంధించిన పత్రాలను ఆర్బీఎల్ ప్రతినిధులు ఆదాయపన్ను అధికారులకు సమర్పించారు. వాటిని పరిశీలిస్తున్న అధికారులు అన్ని సక్రమంగా, నిబంధనలు ప్రకారం ఉన్నాయో లేదా అనే పనిలో ఉన్నారు. చిత్తూరు, చెన్నై ఆదాయపన్ను అధికారుల నుంచి వివరాలు సేకరిస్తున్నారు.