అనంతపురం జిల్లా గుత్తి మండలం కె.ఉబిచెర్ల గ్రామంలో ఇంటిముందు స్థలం విషయంలో అన్నదమ్ముల మధ్య ఘర్షణ చోటుచేసుకుంది. ఈ ఘర్షణలో గంగరాజు, లింగరాజు అనే ఇద్దరు వ్యక్తులకు తీవ్ర గాయాలయ్యాయి. బాధితులు తెలిపిన వివరాల మేరకు... ఇంటి ముందు స్థలం విషయంలో కొన్ని రోజులుగా అన్నదమ్ముల మద్య చిన్నపాటి ఘర్షణలు చోటు చేసుకోవడంతో, ఈ విషయంపై పెద్దల సమక్షంలో మాట్లాడాలంటూ రామగోపాల్, రామాంజనేయులు, భూషన్న అనే వ్యక్తులు అన్నదమ్ములైన రంగరాజు గంగరాజు అనే వ్యక్తులను పిలిపించారు.
ఈ క్రమంలో పెద్దలు మాట్లాడుతుండగానే రామగోపాల్, రామాంజనేయులు, భూషన్న అనే వ్యక్తులు గంగరాజు, లింగరాజు అనే వ్యక్తులపై రాళ్లతో దాడి చేశారు. ఈ దాడిలో అన్నదమ్ములు గంగరాజు, లింగరాజుకు తీవ్రగాయాలు కావడంతో గుత్తి ప్రభుత్వ ఆసుపత్రికి తరలించారు. ప్రథమ చికిత్స అందించిన వైద్యులు పరిస్థితి విషమంగా ఉండడంతో మెరుగైన చికిత్స నిమిత్తం అనంతపురం ప్రభుత్వ ఆస్పత్రికి తరలించారు. ఈ ఘటనపై పోలీసులు కేసు నమోదు చేసుకుని దర్యాప్తు చేపట్టారు.
