అనంతపురం జిల్లా ఉరవకొండ, గుంతకల్లు, రాయదుర్గం, కళ్యాణదుర్గం నియోజకవర్గాల్లో ఖరీఫ్‌లో వర్షాధారంగా సాగయ్యే ప్రధాన పంట వేరుసెనగ. తాడిపత్రి నియోజకవర్గంలో మాత్రం పత్తి పంటకు ప్రాధాన్యం ఇస్తారు. ఖరీఫ్‌ వేళ పంటల సాగుకు రైతులు సిద్ధమవుతున్నారు.
వరుణుడి కరుణ కోసం ఎదురుచూపు
ఉరవకొండ, గుంతకల్లు, రాయదుర్గం, కళ్యాణదుర్గం, తాడిపత్రి నియోజకవర్గాల్లో అత్యధిక శాతం పంటలు వర్షాధారంగా సాగవుతాయి. రాయదుర్గం, కళ్యాణదుర్గం ప్రాంతాల్లో వారం రోజులుగా వర్షం జాడలేదు. మిగతా ప్రాంతాల్లో కొద్దో గొప్పో పడుతున్నాయి. ఇప్పటికే కురిసిన వర్షాలకు రైతులు పొలాలు సిద్ధం చేసుకున్నారు. మరికొందరు అరకొర వర్షానికే వేరుసెనగ, ఆముదం లాంటి పంటలు సాగు చేశారు. ప్రస్తుతం వర్షం కోసం అందరూ ఎదురు చూస్తున్నారు. ఇప్పటికే ప్రభుత్వం రాయితీ వేరుసెనగ విత్తన కాయలను అందించగా, వాటితో పాటు బయట మరింత విత్తనాన్ని కొని సిద్ధంగా ఉంచుకున్నారు.
ఆశలు ఫలించేనా..!
గడిచిన మూడునాలుగేళ్లుగా ఖరీఫ్‌ సాగు ప్రారంభ వేళ తీవ్ర వర్షాభావం నెలకొంటున్న పరిస్థితి. గత ఏడాది కూడా సెప్టెంబరు మాసంలో విస్తృతంగా వర్షాలు కురిశాయి. కానీ, అప్పటికే పంట కాలం సగం దాటి పోవడంతో పెద్ద ప్రయోజనం కనిపించలేదు. దీంతో వేరుసెనగ పంట పరంగా చాలా నష్టం ఎదురైంది. మరి ఈ ఏడాదైనా పంట పండేనా.. చేసిన అప్పులు తీరేనా.. అని రైతులు ఎన్నో ఆశలతో సాగుకు సిద్ధమవుతున్నారు.
ఇదీ చదవండి: మద్యం మత్తులో పోలీసులనే ఢీకొట్టాడు
