Diarrhea Attack: అనంతపురం జిల్లాలో డయోరియా వ్యాప్తి.. ఒకరు మృతి..

Diarrhea Attack: అనంతపురం జిల్లాలో డయేరియా వ్యాధి కోరలు చాచింది. ఈ వ్యాధి సోకిన ఓ మహిళ ఆస్పత్రిలో చికిత్స తీసుకుంటూ మృతి చెందింది. సదరు మహిళ సంబంధికులైన మరో ఐదుగురు ఈ వ్యాధిబారిన పడి.. చికిత్స పొందుతున్నారు. బాధిత గ్రామంలో సుమారు 15 మంది ఈ వ్యాధి బారినపడటంతో.. వైద్య విభాగం అప్రమత్తమైయ్యింది.

Diarrhea Attack: అనంతపురం జిల్లా బొమ్మనహల్ మండలం బొల్లనగుడ్డం గ్రామంలో అతిసార వ్యాధి కోరలు చాచింది. ఈ డయేరియా వ్యాధి సోకి గ్రామానికి చెందిన శాంతమ్మ (23) అనే మహిళ కర్ణాటకలోని బళ్ళారి ఓ ప్రైవేటు వైద్యశాలలో చికిత్స పొందుతూ ఆదివారం ఉదయం మరణించింది. ఆమె ఇంట్లో మొత్తం ఐదుగురు అతిసార వ్యాధి బారిన పడినట్లు కుటుంబ సభ్యులు తెలిపారు. గ్రామానికి చెందిన సుమారు 15 మంది అతిసార వ్యాధి బాధితులు కర్ణాటకలోని బళ్ళారి, రూపనగుడి ప్రభుత్వ వైద్యశాలలో చికిత్సలు పొందుతున్నారు.

గత మూడు రోజులుగా ప్రజలు ఈ అతిసార వ్యాధి భారిన పడి అల్లాడిపోతున్నారు. వాటర్ ట్యాంక్​ను సరిగా క్లీన్ చేయని కారణంగానే గ్రామస్థులు అనారోగ్యానికి గురయ్యారని స్థానికులు ఆరోపిస్తున్నారు. పంచాయతీ, ఆర్​డబ్ల్యూఎస్ అధికారులు, వైద్యారోగ్య శాఖ అధికారులు గ్రామంలో పర్యటించి.. అపరిశుభ్రత నివారణకు చర్యలు చేపట్టారు. మురుగు ఉన్నచోట ఇసుక వేసి బ్లీచింగ్ పౌడర్ చల్లించారు. ఆరోగ్య ఉప కేంద్రం చుట్టూ ఉన్న కంప చెట్లు తొలగించారు. ట్యాంకులను శుభ్రం చేయించి క్లోరినేషన్ చేయించారు. జిల్లా ఆహార భద్రత అధికారి రామచంద్ర.. గ్రామంలోని తాగునీటి నమూనాలను తీసుకుని ల్యాబ్​కు పంపించారు. తాగునీటి వల్ల ఎలాంటి సమస్య లేనట్లు నివేదిక వచ్చినట్లు అధికారులు తెలిపారు.