వలస కూలీలకు అనంత రైతుల సాయం

అనంత రైతులు గొప్ప మనసును చాటుకున్నారు. లాక్​డౌన్​తో ఇబ్బందులు పడుతున్న వలస కూలీలకు సాయం అందించేందుకు ముందుకువచ్చారు. కరవు, లాక్​డౌన్​తో రైతులు కష్టాలు ఎదుర్కొంటున్నా... వాటన్నింటినీ మరచి పేదల కడుపు నింపటానికి వారికి తోచిన సాయం చేస్తున్నారు.

లాక్​డౌన్​తో వలస కూలీల బతుకులు దుర్భరంగా మరాయి. ఉపాధి లేకపోవటంతో ఆకలి తీర్చుకునేందుకు అవస్థలు పడుతున్నారు. అలాంటి వారి కడుపు నింపేందుకు కార్యరూపం దాల్చింది ఆర్​డీటీ సంస్థ. అనంతపురం జిల్లాలో ప్రతి రోజూ దాదాపు 8వేల మంది పేదలకు అన్నదానం చేయాలని సంకల్పించింది. ఈ కార్యక్రమంలో ప్రజలను సైతం భాగస్వాములు చేయాలని నిర్ణయించి గ్రామీణ ప్రాంతాల్లో ప్రచారం కల్పించింది. తోచిన సాయం చేయమని గ్రామీణులను అడిగింది. గుంతకల్లు, వజ్రకరూర్ మండలాల్లోని ప్రజలు ఆర్​డీటీ పిలుపునకు విశేషంగా స్పందించారు. ధాన్యం, నిత్యావసర వస్తువులు అందించారు. కరోనా ప్రభావంతో తక్కువ ధరలకే పండించిన పంటను అమ్ముతున్న రైతులు... తమ కష్టాన్ని మరచి వలస కూలీలకు సాయం చేసేందుకు ముందుకొచ్చారు. రైతుల సాయాన్ని మరవలేమని ఆర్​డీటీ రీజనల్ డైరెక్టర్​ కృష్ణారెడ్డి అన్నారు. ఇలాగే అన్ని ప్రాంతాల ప్రజలు ఆర్​డీటీ చేపట్టిన ఈ కార్యానికి సహాయం అందించాలని ఆయన విజ్ఞప్తి చేశారు.

ఇదీ చదవండి: ఖరీఫ్​కు పటిష్ఠ ప్రణాళికతోనే రైతన్నకు దన్ను