అనంతపురం జిల్లా గుంతకల్లు పట్టణ శివార్లలోని తిమ్మాపురం గ్రామం వద్ద గుంతకల్లు సబ్ బ్రాంచ్ కెనాల్లో ఓ తల లేని మృతదేహం ఉన్నట్టు గ్రామస్థులు గ్రామ రెవెన్యూ అధికారికి సమాచారం అందించారు. స్థానిక గ్రామ రెవెన్యూ సహాయకుడు ద్వారా సమాచారం అందుకున్న పోలీసులు ఆప్రాంతానికి చేరుకొని మృత దేహాన్ని వెలికితీశారు. అయితే ఆ మృతదేహానికి తల, కుడి చెయ్యి లేకుండా ఉండటంతో ఆనవాళ్ల గుర్తింపు పోలీసులకు కష్టంగా మారింది. హత్య జరిగి నాలుగైదు రోజులు అయి ఉంటుందని పోలీసులు భావిస్తున్నారు. తల, ఇతర శరీర భాగాల కోసం చుట్టుపక్కల ప్రాంతాల్లో గాలించారు. అక్కడి నుంచి కొద్ది దూరంలో ఓ బైక్ను పోలీసులు గుర్తించారు. అయితే ఈ ద్విచక్ర వాహనం గుంతకల్లు ప్రభుత్వ ఆసుపత్రిలో పనిచేసే వ్యక్తిదని తెలిసింది. అతను ఇప్పటికే తన వాహనం చోరీకి గురైనట్లు సమాచారం ఇచ్చారని పోలీసు వర్గాలు తెలిపాయి. మృతుడు ధరించిన దుస్తులు బట్టి అతను కర్నూలు జిల్లా నివాసి అని పోలీసులు భావిస్తున్నారు. ఎటువంటి ఆధారాలు లభించకుండా హంతకులు జాగ్రత్తపడ్డారని పోలీసులు అంటున్నారు. శవ పరీక్షల నిమిత్తం మృతదేహాన్ని గుంతకల్లు ప్రభుత్వ ఆసుపత్రికి తరలించారు.
ఇవీ చదవండి
