టోక్యో వేదికగా జరగనున్న పారాలింపిక్స్లో (Tokyo paralympics) పాల్గొననున్న భారత అథ్లెట్లతో ప్రధాని నరేంద్ర మోదీ ముచ్చటించారు. ఆటగాళ్లు పోటీల్లో బాగా రాణించాలన్న ప్రధాని.. వారికి శుభాకాంక్షలు తెలిపారు. ఎలాంటి ఒత్తిడి లేకుండా ఆడాలని అథ్లెట్లకు సూచించారు. ఈ సందర్భంగా షూటర్ జ్యోతి బాలన్ను అభినందించారు ప్రధాని.
"మీకు ఒలింపిక్స్లో పాల్గొనడం ఇదే తొలిసారి. తల్లిదండ్రులు మీకోసం ఎంతో చేశారు. మీరు ఎంతో మందికి ఆదర్శం" అని జ్యోతి బాలన్ను ఉద్దేశిస్తూ ప్రధాని మోదీ వ్యాఖ్యానించారు.
"నా తండ్రి ప్రోత్సాహంతోనే నేను పారాలిపింక్స్లో పాల్గొనే స్థాయికి చేరుకున్నా. కానీ ఆయన ఇప్పుడు లేనందుకు బాధగా ఉంది. నాకు ఆర్థిక ఇబ్బందులు ఉన్నా.. నా కోచ్ నాకు అండగా నిలిచారు. కచ్చితంగా పతకం సాధించాలనే లక్ష్యంతో ఒలింపిక్స్కు వెళ్తున్నా."
-జ్యోతి బాలన్, పారా షూటర్
"పారా అథ్లెట్లను మీరు ఎప్పుడు ప్రోత్సహిస్తూ వచ్చారు. ఇప్పుడు మేము మా అత్యుత్తమ ప్రదర్శన ఇస్తాం. బాల్యంలో నన్ను క్రీడలు మాని చదువుకోమని బలవంతం చేశారు.. కానీ నేను దానిని ఓ సవాల్గా స్వీకరించా. రియో 2016లో మెడల్ సాధించాక చాలా సంతోషపడ్డాను."
-దేవేంద్ర జజారియా, జావెలిన్ త్రో అథ్లెట్
"2011 నుంచి నేను దేశానికి ప్రాతినిధ్యం వహిస్తూ వచ్చా. ఇప్పుడు మరోసారి దేశం గర్వపడేలా చేసేందుకు అవకాశం వచ్చింది. ఎలాంటి పరిస్థితుల్లో కూడా అథ్లెట్లు ఆత్మ విశ్వాసాన్ని కోల్పోకూడదు."
-మరియప్పన్ తంగవేలు, అథ్లెట్
పారాలింపిక్స్లో మొత్తం 9 క్రీడల్లో 54 మంది భారత పారా అథ్లెట్లు తమ అదృష్టాన్ని పరీక్షించుకోనున్నారు. ఈ పోటీల్లో భారత్ తరపున ఇంత మంది అథ్లెట్లు పాల్గొనడం ఇదే తొలిసారి. ఆగస్టు 24 నుంచి సెప్టంబర్ 5 వరకు పారాలింపిక్స్ జరగనున్నాయి.
ఇదీ చదవండి : Tokyo Paralympics: ప్రేక్షకులు లేకుండానే పోటీలు
