Tilak Varma: ఐపీఎల్లో ముంబయి ఇండియన్స్ తరఫున రాణిస్తూ అందరి దృష్టిని ఆకర్షిస్తున్నాడు 19 ఏళ్ల తెలుగు కుర్రాడు తిలక్ వర్మ. సూర్యకుమార్ యాదవ్ లేని లోటును తీరుస్తూ టాప్ ఆర్డర్లో అద్భుతంగా రాణిస్తున్నాడు. ఐపీఎల్ మెగా వేలంలో.. రూ.1.7 కోట్లు పెట్టి ఇతడిని దక్కించుకుంది ముంబయి ఇండియన్స్. తనపై యాజమాన్యం పెట్టుకున్న నమ్మకాన్ని నిలబెడుతూ.. వరుసగా రెండు మ్యాచ్ల్లో 22, 61 పరుగులు చేశాడు. స్ట్రైక్ రేట్ 173గా ఉండటం విశేషం.
ముంబయి ఇండియన్స్ నుంచి ఎందరో కుర్రాళ్లు.. స్టార్లుగా ఎదిగారు. జాతీయ జట్టులోనూ చోటు సంపాదించుకున్నారు. బుమ్రా, హార్దిక్, సూర్యకుమార్ యాదవ్, ఇషాన్ కిషన్ ఇలా ఎందరో ఉన్నారు. ఇప్పుడు తిలక్ కూడా ఆ జాబితాలో చేరినట్లే అనిపిస్తోంది. పేద కుటుంబానికి చెందిన తిలక్ వర్మ.. జూనియర్ స్థాయిలో విశేషంగా రాణించి వెలుగులోకి వచ్చాడు. 2020 అండర్-19 వరల్డ్కప్కు ఎంపికైనా.. అక్కడ అంతగా రాణించలేకపోయాడు. అయినా అతడి కెరీర్ను అవేమీ అడ్డుకోలేకపోయాయి. దేశవాళీల్లో అద్భుత ప్రదర్శనలతో ఐపీఎల్ కాంట్రాక్టు దక్కింది. అతడికి ఇప్పటివరకు సొంత ఇల్లు లేదంట. ఇప్పుడు ఐపీఎల్లో వచ్చే ఆదాయంతో.. ఇల్లు కొనుక్కోవాలని చూస్తున్నాడట.
''మేం పెరుగుతున్న కొద్దీ.. మాకు ఆర్థిక కష్టాలు పెరిగిపోయాయి. మా నాన్నకు వచ్చే కొద్దిపాటి జీతంతో.. నా క్రికెట్ ఖర్చులు, అన్నయ్య చదువును చూసుకోవాల్సి వచ్చేది. కొంతకాలంగా స్పాన్సర్షిప్స్, క్రికెట్ ఆడితే వచ్చితే డబ్బులతో నా ఖర్చులను నేనే చూసుకుంటున్నా. మాకు సొంత ఇల్లు లేదు. ఐపీఎల్లో సంపాదించిన డబ్బుతో.. నా తల్లిదండ్రులకు ఇల్లు ఇవ్వడమే నా ఏకైక లక్ష్యం. వేలంలో నాకు దక్కిన ధర చూసి నా కోచ్, తల్లిదండ్రులు భావోద్వేగానికి గురయ్యారు.''
- తిలక్ వర్మ, ముంబయి ఇండియన్స్ క్రికెటర్
శనివారం జరిగిన మ్యాచ్లో తొలుత బ్యాటింగ్ చేసిన రాజస్థాన్ రాయల్స్.. 20 ఓవర్లలో 8 వికెట్లకు 193 పరుగులు చేసింది. బట్లర్ 100 పరుగులు చేశాడు. శాంసన్(30), హెట్మయర్(35) రాణించారు. బుమ్రా, టైమల్ మిల్స్ చెరో 3 వికెట్లు తీశారు. అనంతరం బ్యాటింగ్కు దిగిన ముంబయికి శుభారంభం దక్కలేదు. ఆరంభంలోనే కెప్టెన్ రోహిత్(10) అవుటయ్యాడు. 40 పరుగుల వద్ద రెండో వికెట్ పడిపోయింది. అప్పుడు ఇషాన్ కిషన్తో కలిసి దూకుడుగా ఆడాడు తిలక్ వర్మ. 3 ఫోర్లు, 5 సిక్సర్లతో 33 బంతుల్లోనే 61 పరుగులు చేసి.. మ్యాచ్ను గెలిపించినంత పనిచేశాడు. కానీ ఇన్నింగ్స్ 15వ ఓవర్లో అశ్విన్ వేసిన చక్కటి బంతికి బౌల్డయ్యాడు. ఆ తర్వాత వరుసగా వికెట్లు కోల్పోయిన ముంబయి.. మ్యాచ్ ఓడిపోయింది. తిలక్ వర్మ ఇన్నింగ్స్పై మాత్రం ప్రశంసలు కురుస్తున్నాయి. ముంబయి ఇండియన్స్ తరఫున అర్ధసెంచరీ సాధించిన పిన్నవయస్కుడిగా నిలిచాడు. ఇషాన్ కిషన్ 19 ఏళ్ల 278 రోజుల వయసులో ఈ ఘనతను అందుకోగా.. తిలక్ 19 ఏళ్ల 145 రోజులకే చేరుకున్నాడు.
ఇవీ చూడండి: ఫైనల్లో 'హేలీ' ప్రపంచ రికార్డ్.. ఇంగ్లాండ్ ముందు భారీ లక్ష్యం
24 ఏళ్ల నాటి సచిన్ రికార్డు బ్రేక్.. ఆ కెప్టెన్ అరుదైన ఘనత
