Asia Cup 2023 Venue Pakistan : ఆసియా కప్ నిర్వహించే విషయంలో పాకిస్థాన్కు గట్టి షాక్ తగిలింది. ఈ మెగా టోర్నీని ఆసియా క్రికెట్ కౌన్సిల్ ఆ దేశం నుంచి తరలించింది. పాక్ ప్రతిపాదించిన హైబ్రిడ్ మోడల్ను కూడా తిరస్కరించింది. ఈ విషయంలో శ్రీలంక, బంగ్లాదేశ్ కూడా బీసీసీఐకి సపోర్ట్గా నిలిచాయి. అయితే, ఈ సారి ఆసియా కప్ శ్రీలంకలో జరిగే అవకాశం ఉన్నట్లు తెలుస్తోంది. అయితే, శ్రీలంకకు పోటీగా యూఏఈ కూడా ఉంది. కానీ, వేసవిలో యూఏఈలో తేమ శాతం ఎక్కువ ఉంటుంది కాబట్టి.. శ్రీలంకలో ఆసియా కప్ జరగడం ఇక లాంఛనమే.
అంతకుముందు, పాక్లో ఆసియా కప్ జరిగితే తమ జట్టును అక్కడికి పంపించబోమని బీసీసీఐ తేల్చిచెప్పింది. అందుకే టోర్నీని పాకిస్థాన్ నుంచి వేరే దేశానికి తరలించాలని డిమాండ్లు వినిపించాయి. ఆసియా క్రికెట్ కౌన్సిల్ అధ్యక్షుడు జై షా కూడా ఈ ప్రతిపాదనను ఇప్పటికే ఏసీసీ ముందు ఉంచారు. అయితే ఈ ప్రతిపాదనను పాకిస్థాన్ బోర్డు తీవ్రంగా వ్యతిరేకించింది.
భారత్ మ్యాచ్‌లను మరో చోట నిర్వహించాలని, ఆసియా కప్ ఆతిథ్య హక్కులను పాకిస్థాన్ బోర్డుకు ఇవ్వాలని పీసీబీ చైర్మన్‌ నజం సేథీ అంతకుముందు ఏసీసీకి ప్రతిపాదించారు. దీనిపై ఆసియా క్రికెట్ కౌన్సిల్ తాజాగా నిర్ణయం తీసుకుంది. ఇందులో పాకిస్థాన్ మరో షాకింగ్ విషయం ఎంటంటే.. ఆసియా కప్ను ఆ దేశం నుంచి షిఫ్ట్ చేశారు కాబట్టి.. ఒకవేళ పాక్ ఈ టోర్నీలో ఆడకపోతే.. ఆ స్థానంలో ఆ జట్టు స్థానంలో యూఏఈకి అవకాశం ఇవ్వాలని ఏసీసీ యోచిస్తున్నట్లు తెలుస్తోంది. ఇదే నిజమైతే పాకిస్థాన్ బోర్డుకు, జట్టుకు కోలుకోలేని దెబ్బ తగిలినట్లే. ఇప్పుడు పాక్ నుంచి ఆసియా కప్ తరలించారు కాబట్టి.. ఆ దేశ క్రికెట్ బోర్డు ఏం నిర్ణయం తీసుకుంటుందనేది ఆసక్తి నెలకొంది.
భారత్ ఆసియా కప్ కోసం పాక్లో పర్యటించకుంటే.. తాము కూడా 2023 చివర్లో ఇండియాలో జరగబోయే వన్డే వరల్డ్ కప్లో పాల్గొనమని గతంలో పాక్ చెప్పింది. దీంతో ఆలోచనలో పడ్డ బీసీసీఐ.. ఆసియా రద్దు చేసేందుకు సన్నాహాలు మొదలు పెట్టిందని తెలుస్తోంది. ఈ ఆసియా కప్ టోర్నీ స్థానంలో ఐదు దేశాల టోర్నీ నిర్వహించాలనే ఆలోచనలో బీసీసీఐ ఉన్నట్లు ప్రచారం సాగుతోంది. ఇదే కనుక జరిగితే ఆసియా కప్ నిర్వహించే టైమ్ విండోలో ఈ ప్రతిపాదిత ఐదు దేశాల టోర్నీ ఆడే ఆస్కారముంది. కాగా, గతేడాది ఆసియా కప్ టీ20 మెగా టోర్నీలో భారత్, పాకిస్థాన్, శ్రీలంక, బంగ్లాదేశ్, అఫ్గానిస్థాన్లతో పాటు హాంగ్‌ కాంగ్‌ హోరాహోరీగా పోటీపడ్డాయి. అయితే ఈ మెగా ఈవెంట్‌లో శ్రీలంక ట్రోఫీని సొంతం చేసుకోగా.. పాకిస్థాన్ రన్నరప్‌గా నిలిచింది.
