Ajit Agarkar BCCI : భారత సీనియర్ పురుషుల క్రికెట్ సెలక్షన్‌ కమిటీ ఛైర్మన్‌గా టీమ్ఇండియా మాజీ పేసర్ అజిత్ అగార్కర్‌ను నియమిస్తూ బీసీసీఐ ఇటీవలే నిర్ణయం తీసుకుంది. ఈ క్రమంలో ఆయనకు సంబంధించిన ట్రాక్ రికార్డును తెలుసుకోవడానికి నెటిజెన్లు పెద్ద ఎత్తున సెర్చ్ చేస్తున్నారట. ఈ నేపథ్యంలో అజిత్ అగార్కర్ అంతర్జాతీయ క్రికెట్ కెరీర్కు సంబంధించి పలు ఆసక్తికర విషయాలు మీకోసం.
Ajit Agarkar Cricket Career : 1997 లో మహారాష్ట్రలోని ముంబయిలో జన్మించాడు అజిత్ అగార్కర్. 1998లో అంతర్జాతీయ క్రికెట్లోకి ఎంట్రీ ఇచ్చిన అజిత్.. 1998-2007 మధ్య 191 వన్డేలు, 26 టెస్టులు, 4 టీ20లు ఆడాడు. ఈ మూడు ఫార్మాట్లలో కలిపి వరుసగా 288, 58, 3 వికెట్లు పడగొట్టాడు. 1999, 2003, 2007 వన్డే ప్రపంచకప్‌ల్లో భారత జట్టులో సభ్యుడిగా కూడా ఉన్నాడు. 2007లో ధోనీ సారథ్యం వహించిన జట్టు ఉన్న అగార్కర్.. జట్టు గెలుపులో కీలక బాధ్యతలు పోషించాడు. అయితే అజిత్ ప్రధానంగా బౌలర్‌ అయినప్పటికీ.. అప్పుడప్పుడు రైట్ హ్యాండ్ బ్యాటర్గానూ తన విశ్వరూపాన్ని చూపించాడు. ఈ క్రమంలో లార్డ్స్ టెస్టులో శతక్కొట్టిన ఈ స్టార్ ప్లేయర్ రికార్డులివి..
- 2002లో లార్డ్స్ మైదానంలో ఇంగ్లాండ్‌తో జరిగిన టెస్ట్ మ్యాచ్‌ రెండో ఇన్నింగ్స్‌లో అజిత్ అగార్కర్ (109) 190 బంతుల్లో 16 ఫోర్ల సాయంతో శతకం బాదాడు. అయితే లార్డ్స్లో సెంచరీ బాదిన అతి కొద్దిమంది భారత క్రికెటర్లలో ఒకడిగా అజిత్ నిలిచాడు.
- వన్డే క్రికెట్ చరిత్రలో భారత్ తరఫున అత్యంత వేగవంతమైన అర్ధ శతకం బాదిన రికార్డు కూడా అజిత్ అగార్కర్ పేరిటే ఉంది. 2000లో జింబాబ్వేపై 21 బంతుల్లోనే 4 సిక్స్‌లు, 7 ఫోర్ల సాయంతో 67 పరుగులు చేసి నాటౌట్‌గా నిలిచాడు. ఇప్పటివరకు ఆ రికార్డును ఎవరూ బ్రేక్ చేయకపోవడం విశేషం.
- వన్డేల్లో అత్యంత వేగంగా 50 వికెట్లు పడగొట్టి అరుదైన రికార్డు నెలకొల్పాడు. 23 మ్యాచ్‌ల్లోనే అగార్కర్ ఈ మైలురాయిని అందుకున్నాడు. ప్రస్తుతం ఈ జాబితాలో అతడు మూడో స్థానంలో కొనసాగుతున్నాడు.
- వన్డే క్రికెట్‌లో 1000కి పైగా పరుగులు సాధించడమే కాకుండా.. 50 వికెట్లు, 50 క్యాచ్‌లు అందుకున్న ఎనిమిది మంది భారత క్రికెటర్లలో ఒకడిగా అజిత్ అగార్కర్ ఉన్నాడు.
- వన్డేల్లో 1000 కంటే ఎక్కువ పరుగులు చేసి 100కు పైగా వికెట్లు తీసిన 10 మంది భారత ఆటగాళ్ల జాబితాలోనూ అగార్కర్‌కు చోటు ఉంది.
- 2004లో అడిలైడ్ ఓవల్‌ మైదానంలో ఆస్ట్రేలియాపై 6/41తో అగార్కర్ సత్తా చాటాడు. అతని టెస్టు కెరీర్‌లో ఇదే ఏకైక ఆరు వికెట్ల ప్రదర్శన కావడం విశేషం. ఈ మ్యాచ్‌లో భారత్ నాలుగు వికెట్ల తేడాతో విజయం సాధించింది.
- టెస్టు క్రికెట్‌లో వరుసగా ఐదుసార్లు డకౌట్ అయిన చెత్త రికార్డు కూడా అజిత్ పేరిటే ఉంది. అది కూడా ఆసీస్ చేతిలోనే ఔట్ కావడం గమనార్హం. ఆస్ట్రేలియన్ మాజీ క్రికెటర్ బాబ్ హాలండ్, పాకిస్థాన్ మాజీ ఆటగాడు మహ్మద్‌ ఆసిఫ్‌ కూడా ఈ జాబితాలో ఉన్నారు.
- ఇవీ చదవండి:
- IPL 2022: దిల్లీ క్యాపిటల్స్ కోచ్లుగా షేన్ వాట్సన్, అగార్కర్!
- టీమ్ఇండియా కొత్త బౌలింగ్ కోచ్గా అగార్కర్!
