కొత్త సంవత్సర వేడుకల్లో భాగంగా మద్యం తాగిన నలుగురు బాలురు బెదిరించి ఇద్దరు అక్కాచెల్లెళ్లపై అత్యాచారానికి పాల్పడిన ఘటన ఆలస్యంగా వెలుగులోకి వచ్చింది. ఈ అమానుష ఘటన నాగర్కర్నూల్ జిల్లాలోని లింగాల మండలంలో జరిగింది. స్థానికుల కథనం ప్రకారం.. డిసెంబరు 31 వేడుకల్లో భాగంగా 14 నుంచి 16 ఏళ్ల వయసున్న నలుగురు బాలురు పీకల దాకా మద్యం తాగారు. అర్ధరాత్రి ఆ గ్రామంలోని ఓ వితంతువు ఇంటికి వెళ్లారు. ఆమెను భయపెట్టి ఇద్దరు కుమార్తెలపై అత్యాచారానికి ఒడిగట్టారు. అంతేకాకుండా ఆ దురాగతాన్ని సెల్ఫోన్లలో చిత్రీకరించి విషయం బయటికి చెప్పవద్దని హెచ్చరించారు.
నిందితులు తమ వద్ద చిత్రాలు ఉన్నాయని భయపెట్టడం వల్ల ఆ నిరుపేద కుటుంబం ఫిర్యాదు చేసేందుకు సాహసించలేదు. కాగా గ్రామంలో కొందరు వ్యక్తులు పంచాయితీ పెట్టి నిందితుల నుంచి పరిహారం ఇప్పించేలా ఒప్పందం కుదిర్చినట్లు సమాచారం. ఈ విషయమై ఎస్సై కృష్ణయ్యను సంప్రదించగా అత్యాచారంపై తమకు ఇప్పటివరకు ఎలాంటి ఫిర్యాదు అందలేదని తెలిపారు.
ఇదీ చదవండి: రూ. 10వేలు ఇవ్వడం భారమవుతుందని... రూ.157 కోట్లు పక్కన పడేశారు...!
