హైదరాబాద్ బంజారాహిల్స్‌ రోడ్డు నం.2లోని ఇందిరానగర్‌లో నివసించే రుడావత్‌ అనిల్.. వికారాబాద్‌ జిల్లాకు చెందిన అనితలది ప్రేమ వివాహం. సినిమా సెట్టింగులు, వేదికల అలంకరణ సామగ్రి అద్దెకిస్తూ జీవిస్తున్నారు. వీరికి ఇద్దరు కుమార్తెలు, ఒక కుమారుడు ఉండగా నెలన్నర క్రితం మరో బాబు పుట్టాడు. కొన్నేళ్లుగా అనిల్ కట్నం కోసం వేధిస్తుండడం వల్ల రెండేళ్ల క్రితం భార్య పోలీసులకు ఫిర్యాదు చేసింది.
శనివారం రాత్రి పూటుగా మద్యం తాగివచ్చి భార్యతో గొడవకు దిగాడు. హీటర్‌తో విచక్షణారహితంగా కొట్టాడు. అమ్మను కొట్టొద్దు నాన్నా అని పెద్ద కుమార్తె ప్రాథేయపడినా.. కనికరించలేదు. భార్య ప్రాణాలు వదలడంతో పిల్లలను వదిలేసి పరారయ్యాడు. సమాచారం అందుకున్న బంజారాహిల్స్‌ పోలీసులు మృతదేహాన్ని ఉస్మానియా ఆసుపత్రికి తరలించి కేసు నమోదు చేశారు. నిందితుడి కోసం గాలిస్తున్నారు. నెలన్నర బాబు తల్లిపాల కోసం గుక్కపెట్టి ఏడుస్తుండటం, మిగిలిన ముగ్గురు పిల్లల బేల చూపులు స్థానికుల కళ్లు చెమర్చేలా చేశాయి.
ఇవీ చూడండి: ఆగని కరోనా ఉద్ధృతి.. 62 లక్షలు దాటిన కేసులు
