అమెరికా, దక్షిణ కొరియాతో తాడోపేడో తేల్చుకునేందుకు సిద్ధమైంది ఉత్తర కొరియా. ప్రపంచ దేశాల హెచ్చరికలను బేఖాతర్‌ చేస్తూ కొన్నినెలల నుంచి వరుసగా సరికొత్త ఆయుధ పరీక్షలు నిర్వహిస్తోంది. బుధవారం ఒకేసారి 23 క్షిపణులను పరీక్షించిన కిమ్ సర్కార్‌ గురువారం మరో 3 మిస్సైళ్లను పరీక్షించింది. అందులో ఒకటి ఖాండాంతర బాలిస్టిక్‌ క్షిపణి కూడా ఉంది. ఉత్తర కొరియా రాజధాని ప్యాంగ్యాంగ్ సమీపప్రాంతం నుంచి ఉదయం 7.40 గంటలకు ఖండాంతర బాలిస్టిక్‌ క్షిపణిని ప్రయోగించినట్లు దక్షిణ కొరియా సైనికాధికారులు తెలిపారు.
ఓ గంట తర్వాత కాచియోన్‌ నగరం సమీపం నుంచి రెండు స్వల్ప శ్రేణి క్షిపణులను తూర్పు జలాల వైపు పరీక్షించినట్లు చెప్పారు. పొరుగు దేశాలకు చేరకుండా దీర్ఘశ్రేణి మిస్సైల్‌ను పరీక్షించినట్లు దక్షిణ కొరియా సైనికాధికారులు తెలిపారు. అయితే ఉత్తర కొరియా పరీక్షించిన ఖండాంతర బాలిస్టిక్‌ మిస్సైల్‌ పరీక్ష విఫలమైందని, అది మధ్యలోనే పేలిపోయిందన్న వార్తలపై స్పందించేందుకు దక్షిణ కొరియా రక్షణ శాఖ వర్గాలు నిరాకరించాయి. ఈ మిస్సైల్‌ పరీక్షను విశ్లేషించాల్సి ఉందని పేర్కొన్నాయి.
ఉత్తర కొరియా ఆయుధ పరీక్షల నేపథ్యంలో అప్రమత్తమైంది జపాన్. యమగత, నిగత ప్రాంతాల ప్రజలను ఇళ్లలోనే ఉండాలని లేదా అండర్‌ గ్రౌండ్‌లోకి వెళ్లాలని సూచించింది. రేడియా, దూరదర్శన్‌, మొబైల్స్‌, లౌడ్‌ స్పీకర్ల ద్వారా ప్రచారం చేసింది. బుల్లెట్ రైళ్లు తాత్కాలికంగా నిలిపివేసిన జపాన్. ఆ తర్వాత పునరుద్ధరించింది. ప్యాంగ్యాంగ్ చేపట్టిన ఖండాంతర బాలిస్టిక్‌ క్షిపణి గరిష్టంగా 2వేల కిలోమీటర్ల ఎత్తుకు, 750కిలోమీటర్ల దూరం ప్రయాణించినట్లు జపాన్ సైనికవర్గాలు ప్రకటించాయి. ఆ తర్వాత ట్రాక్‌ చేయలేకపోయినట్లు పేర్కొన్నాయి.
ప్యాంగ్యాంగ్ పరీక్షించిన ఖండాంతర బాలిస్టిక్‌ మిస్సైల్‌ తమ ఉత్తర భాగంపై నుంచి వెళ్తుందని జపాన్ కలవరం చెందింది. ఆ తర్వాత అంచనాలను సవరించిన అధికారులు, తమ భూభాగం నుంచి వెళ్లలేదంటూ ఊపిరి పీల్చుకున్నారు. అంచనా వేసిన ప్రాంతాల్లో ఎలాంటి నష్టం జరిగినట్లు, ప్రజలు గాయపడినట్లు సమాచారంలేదని సంబంధిత వర్గాలు ప్రకటించాయి.
