తైవాన్లో సంభవించిన ఘోర అగ్ని ప్రమాదంలో 46 మంది మరణించారు. అనేక మంది గాయపడ్డారు. దక్షిణ తైవాన్‌లోని 13 అంతస్తుల భవనంలో చెలరేగిన మంటలు ప్రస్తుతం అదుపులోకి వచ్చాయని.. సహాయక చర్యలు కొనసాగుతున్నాయని అగ్నిమాపక శాఖ వెల్లడించింది.
కాహ్సియుంగ్ నగరంలో తెల్లవారుజామున 3 గంటల సమయంలో జరిగిన ఈ ప్రమాదానికి గల కారణాలు స్పష్టంగా తెలియనప్పటికీ.. భవనంలో అస్తవ్యస్తంగా సామగ్రి పడి ఉన్నచోటే మంటలు వ్యాపించినట్లు ప్రాథమికంగా గుర్తించారు. 'ఇది అత్యంత భయంకరమైన అగ్నిప్రమాదం.. దీని తీవ్రతకు భవనంలోని పలు అంతస్తులు ధ్వంసమయ్యాయి' అని ఓ అధికారి వెల్లడించారు.
'తెల్లవారుజామున 3 గంటల సమయంలో పేలుడు శబ్దం విన్నామని' ప్రత్యక్ష సాక్షులు తెలిపారు. దాదాపు 40 సంవత్సరాల క్రితం నిర్మించిన ఈ భవనంలో కింద షాపింగ్ కాంప్లెక్స్లు, పైన అపార్ట్‌మెంట్లు ఉన్నాయి.
