బాలీవుడ్ ప్రముఖ సంగీత దర్శకుడు, గాయకుడు హనీసింగ్ బాలీవుడ్ బాద్షా షారుక్ ఖాన్పై ఆసక్తికర వ్యాఖ్యలు చేశారు. బాలీవుడ్ సినిమాలకు సంగీతం అందించడం తనకు ఇష్టం లేదని చెప్పారు. అలా చేసిన ప్రతిసారి.. ఏదో ఒక విధంగా ఇబ్బంది పడ్డానని తెలిపారు. 'చెన్నై ఎక్స్ప్రెస్' అనే సినిమాకు చేసిన లుంగీ డ్యాన్స్ అనే పాట షారుక్ నచ్చలేదన్నారని తెలిపారు.
''చెన్నై ఎక్స్ప్రెస్' చిత్రానికి ఒక పాట చేయాలని హీరో షారూక్ ఖాన్ నన్ను పిలిచారు. ఓ ఇంగ్లీష్ బీట్తో మంచి పాట చేయమన్నారు. అయితే, ఇదివరకే ఆ పాట మంచి హిట్ అయింది. దీంతో ఆ పాట నేను చేయనని చెప్పాను. కానీ, దాని కన్నా అదిరిపోయే సాంగ్ మాత్రం చేస్తానని హామీ ఇచ్చాను. చెప్పినట్టుగానే 'లుంగీ డ్యాన్స్' పాట చేశాను. కానీ ఈ సాంగ్ షారుక్ ఖాన్కు అంతగా నచ్చలేదు. ఆ పాటను సినిమాలో పెట్టుకోవాలా లేదా అని నిర్ణయం తీసుకోవడానికి ఆయన మూడు వారాల సమయం తీసుకున్నారు. అనంతరం సినిమాలో ఆ పాటను పెట్టుకున్నారు. ఇక, లుంగీ డ్యాన్స్ పాట ఏ రేంజ్లో ఉర్రూతలూగించిందో మీ అందరికీ తెలిసిన విషయమే' అని హనీ సింగ్ చెప్పుకొచ్చారు.
ఇక, చెన్నై ఎక్స్ప్రెస్ సినిమా విషయానికి వస్తే.. షారుక్ ఖాన్, దీపికా పదుకొణె హీరో, హీరోయిన్లుగా ఈ చిత్రం తెరకెక్కింది. ఈ మూవీలోని 'లుంగీ డ్యాన్స్' అనే పాట అప్పట్లో సూపర్ హిట్ అయింది. అన్ని వయసుల వారిని ఉర్రూతలూగించింది. ఇప్పటికి కూడా యూట్యూబ్లో ఎక్కువ మంది చూసిన పాటల లిస్టులో ఈ పాట ఒకటిగా ఉంది.
'పఠాన్' సంచలన విజయాన్ని ఎంజాయ్ చేస్తున్న షారుక్ ఖాన్.. ప్రస్తుతం వరుస సినిమాలతో దూసుకెళ్తున్నారు. ప్రస్తుతం తమిళ దర్శకుడు అట్లీ డైరెక్షన్లో 'జవాన్' చిత్రం చేస్తున్నారు. ప్రస్తుతం ఈ మూవీ చిత్రీకరణ పూర్తైంది. ఈ సినిమాలో షారుక్ సరసన నయనతార నటిస్తోంది. సునీల్ గ్రోవర్, సన్యా మల్హోత్రా ప్రధాన పాత్రలు పోషిస్తున్నారు. మరోవైపు, రాజ్‌కుమార్ హిరానీతో కలసి 'డుంకీ' అనే సినిమా చేస్తున్నారు షారుక్ ఖాన్. ఇందులో తాప్సీ కథానాయికగాన నటిస్తోంది. ఈ చిత్రం 2023 క్రిస్మస్ కానుకగా థియేటర్లలో రిలీజ్ కానుంది.
