2021లో విడుదలై బ్లాక్ బస్టర్ హిట్ను సాధించిన పుష్ప సినిమా.. పాన్ ఇండియా లెవెల్లోనే కాకుండా ప్రపంచ వ్యాప్తంగా మంచి పేరు సంపాదించింది. సుకుమార్ దర్శకత్వంలో తెరకెక్కిన ఈ సివిమాలో ఐకాన్ స్టార్ అల్లు అర్జున్, రష్మిక మందన్న జంటగా నటించారు. ఎర్ర చందనం స్మగ్లింగ్ నేపథ్యంలో తెరకెక్కిన ఈ సినిమా ప్రేక్షకులను అలరించింది. ముఖ్యంగా ఇందులో అల్లు అర్జున్ లుక్తో పాటు ఆయన యాస అభిమానులను ఆకర్షించింది. 2021లో రిలీజైన ఈ సినిమా ఎన్నో రికార్డులను బద్దలుగొట్టింది. ఎటువంటి ప్రమోష‌న్లు లేకుండానే బాలీవుడ్‌లో రిలీజైన ఈ చిత్రం.. ఏకంగా రూ.100 కోట్లు మేర వసుళ్లు సంచలనం సృష్టించింది. ఈ సినిమాలోని పాత్రలతో పాటు డైలాగ్స్ కూడా సెన్సేషన్ క్రియేట్ చేశాయి. 'పుష్ప అంటే ఫైర్', అలాగే 'తగ్గేదే లే' అనే డైలాగ్స్ ఇప్పటికీ ట్రెండ్ అవుతూనే ఉన్నాయి. ఈ సినిమా రష్యలో కూడా రిలీజై అక్కడ కూడా ఫర్వాలేదనిపించింది.
అయితే ఈ సినిమాకు సీక్వెల్గా పుష్ప ద రూల్స్ తెరకెక్కుతోంది. ఇప్పటికే హైదరాబాద్తో పాటు పలు చోట్ల శరవేగంగా షూటింగ్ జరుగుతున్న ఈ సినిమాలో పాత క్యారెక్టర్లతో పాటు మరిన్ని కొత్త క్యారెక్టర్లు కూడా యాడ్ అవ్వనున్నట్లు సమాచారం. ఇందులో భాగంగానే నటి సాయి పల్లవి కూడా ఓ కెమియో రోల్లో నటించనున్నారట. అందుకు తన కాల్షీట్లోని పది రోజులను కూడా కేటాయించారట. దీంతో ఈ సినిమాకు మరింత హైప్ పెరిగింది. కాగా ఏప్రిల్ 8న అల్లు అర్జున్ పుట్టినరోజు సందర్భంగా పుష్ప 2 టీజర్‌ను లాంచ్ చేసేందుకు మూవీ టీమ్ సన్నాహాలు చేస్తోందట.
కోట్లు గడిస్తున్న ప్రీ-రిలీజ్ బిజినెస్..
ఇన్నీ రూమర్స్ నడుమ తాజాగా మరో వార్త సామాజిక మాధ్యమాల్లో సంచలనాలను సృష్టిస్తోంది. అదేంటంటే.. ఈ సినిమా విడుదలకు ముందే నిర్మాతలకు కోట్లు కురిపిస్తోందట! థియేట్రికల్ రైట్స్ ద్వారా ఇప్పటికే వెయ్యి కోట్ల రూపాయలను వసూలు చేసిందట. అయితే ఈ విషయంపై ఎక్కడా కూడా అధికారికంగా ఎటువంటి సమాచారం వెలువడలేదు. అయినప్పటికీ ఈ వార్త ప్రస్తుతం నెట్టింట హల్ చల్ చేస్తోంది. కాగా, పుష్ప - ది రైజ్ సినిమా.. ప్రపంచవ్యాప్తంగా దాదాపు రూ.400 కోట్లు వసూలు చేసింది 2021లోనే అత్యధిక వసూళ్లు సాధించిన సినిమాల్లో ఒకటిగా రికార్డుకెక్కింది.
ఇక సినిమా ఇతర వివరాల విషయానికి వస్తే.. మైత్రీ మూవీ మేకర్స్, ముత్తం శెట్టి మీడియా సంయుక్తంగా తెరకెక్కించిన సినిమా పుష్ప. సుకుమార్ దర్శకత్వంలో వచ్చిన ఈ సినిమాలో అల్లు అర్జున్ సరసన నేషనల్ క్రష్ రష్మిక మందన్న నటించారు. సునీల్, ఫహాద్ ఫాజిల్, అనసూయ తదితరులు కీలక పాత్రలు పోషించారు.
