విశాఖపట్నం జిల్లాలోని చోడవరం పట్టణంలో ప్రైవేటు పాఠశాలలో ఎనిమిదో తరగతి చదువుతున్న బాలికను అదే పాఠశాలలో ఉపాధ్యాయుడిగా పనిచేస్తున్న కొయ్యాన తిరుపతిరావు 2015 జూన్‌26 కిడ్నాప్ చేసి విశాఖకు తీసుకెళ్లాడు. అక్కడి నుంచి దిల్లీకి.. రాజస్థాన్‌కు మకాం మార్చాడు. అక్కడి నుంచి మళ్లీ హరియాణాకు వెళ్లి మరోసారి తెలంగాణాలోని నిజామాబాద్‌కు తీసుకొచ్చాడు. ఇలా తిప్పి రాజస్థాన్‌లోని జోగీఘట్టాలో స్థిరపడ్డాడు.
ఆనాటి నుంచి ఆ బాలిక తల్లిదండ్రులు తమ ప్రయత్నాలు కొనసాగిస్తూనే ఉన్నారు. 2016లో వారి రోదన చూసి, ఉదాసీనంగా వ్యవహరించారంటూ అప్పటి సీఐ మురళీరావును బదిలీ చేశారు. 2017లో ఉన్నతాధికారులకు మొరపెట్టుకోగా, సీబీసీఐడీకి కేసు అప్పగించారు. అయినా కేసు పురోగతి లేదంటూ ఆ తండ్రి హైకోర్టును సైతం ఆశ్రయించాడు.
బాలికను తీసుకెళ్లిన తిరుపతిరావు రాజస్థాన్‌లో అళ్వార్‌ జిల్లా జోగీఘట్టాలోని విజయనగర్‌ కాలనీలో పిల్లలకు ట్యూషన్స్‌ చెప్పుకొంటూ జీవనం సాగించేవాడు. వారికి అయిదేళ్ల పాప, మూడేళ్ల బాబు ఉన్నారు. బతుకుదెరువు కోసం బ్యాంకు రుణానికి దరఖాస్తు చేశాడు. అప్పటికే విశాఖ జిల్లాలో డిఫాల్టర్‌ అయినట్లు తేలింది. బ్యాంకు లావాదేవీలు, పాన్‌ కార్డుల ద్వారా సాంకేతిక పరిజ్ఞానంతో ఐటీ కోర్‌ బృందం నిందితుడి ఆచూకీని కనిపెట్టింది. ఆ సమాచారంతో సీఐ ఇలియాస్‌ మహమ్మద్‌, ఎస్సై విభీషణరావు, సిబ్బంది రాజస్థాన్‌ వెళ్లారు. అక్కడి పోలీసుల సహాయంతో ట్రాన్సిస్ట్‌ వారంట్‌పై వారిద్దరినీ ఇక్కడికి తీసుకొచ్చారు. ‘బాలికను కిడ్నాప్ చేసే సమయానికే తిరుపతిరావుకు భార్య, కొడుకు ఉన్నారు. అతడిపై పలు సెక్షన్ల కింద కేసు నమోదు చేశాం. ప్రస్తుతం బాధితురాలి వయస్సు 18 ఏళ్ల నాలుగు నెలలు. ఆమె ఇచ్చే ఫిర్యాదుపై కేసు దర్యాప్తు మరింత గట్టిగా ఉంటుంద’ని సీఐ చెప్పారు.
ఆశలు వదులుకున్నాక ఆనందం
ఇన్నాళ్లకు మా పాప దొరికిందన్న ఆనందం ఎవరికీ చెప్పుకోలేనిది. కిడ్నాపర్‌ మా పాపను ఎక్కడో ఏదో చేసి ఉంటాడని భయపడి ఆశ వదులుకున్నాం. దేవుడు దయదలిచాడు. మా పాప మా చెంతకు చేరింది. ఏం జరిగిందనేది చెప్పలేకపోతోంది. వివరాలు చెప్పినదాన్ని బట్టి కేసు విషయంలో ముందుకు వెళ్తాం. నిందితుడిని బయట ప్రపంచానికి తెలిసేలా చేస్తే బాగుండేది. ఇలా చేయడం వల్ల ఇటువంటి సంఘటనలు జరగకుండా ఉంటాయి. - బాధితురాలి తండ్రి, చోడవరం
ఇదీ చూడండి: DASARA HOLLYDAYS: 11 నుంచి పాఠశాలలకు దసరా సెలవులు
