జాతీయ స్థాయిలో జీవీఎంసీకి గుర్తింపు

సొంతిల్లులేని నిరుపేదల్ని గుర్తించే ప్రక్రియలో జీవీఎంసీ తీసుకున్న నిర్ణయాలు కేంద్ర ప్రభుత్వాన్ని ఆకర్షించాయి. ఈ విషయంలో దేశంలో ఉత్తమ ప్రతిభ కనబరిచిన మున్సిపల్‌ కార్పొరేషన్‌గా గుర్తించి జాతీయ అవార్డుకు ఎంపిక చేశారు. జనవరి 1న ప్రధాని చేతుల మీదుగా జీవీఎంసీ అధికారులు ఈ అవార్డును అందుకోనున్నారు.

విశాఖ ఖాతాలో మరో జాతీయ స్థాయి అవార్డు చేరనుంది. ఇళ్ల లబ్ధిదారుల ఎంపికలో ఉత్తమ ప్రతిభ కనబరిచిన మున్సిపల్‌ కార్పొరేషన్‌గా జీవీఎంసీని జాతీయ అవార్డుకు ఎంపిక చేసింది కేంద్ర ప్రభుత్వం. నూతన సంవత్సరంలో మొదటి రోజున ప్రధాని మోదీ చేతుల మీదుగా దీనిని జీవీఎంసీ అధికారులు అందుకోనున్నారు.

పేదలందరికీ ఇళ్లు ఇవ్వాలనే కేంద్రప్రభుత్వ లక్ష్యంలో భాగంగా.. 2019కి ముందు గత ప్రభుత్వం ఆధ్వర్యంలో లబ్దిదారుల జాబితాను ఎంపిక చేశారు. ఆ తర్వాత ప్రభుత్వం మారాక పాత లబ్దిదారుల జాబితాని రద్దుచేసి కొత్తగా మళ్లీ దరఖాస్తుల్ని ఆహ్వానించారు. పలు దఫాలుగా దరఖాస్తుల్ని వడపోసి లబ్దిదారుల చివరి జాబితా తీశారు. ఈ మొత్తం ప్రక్రియలో జీవీఎంసీ అధికారులు శ్రమించిన తీరును కేంద్ర ప్రభుత్వం గుర్తించిందని జీవీఎంసీ అధికారులు వెల్లడించారు. లబ్దిదారుల ఎంపిక ప్రక్రియలో పారదర్శకతను కేంద్ర గృహ, పట్టణ వ్యవహారాల మంత్రిత్వశాఖ ప్రత్యేకంగా కొనియాడిందని వారు తెలిపారు.

2019-20 సంవత్సరానికిగానూ జీవీఎంసీకి ఈ ఉత్తమ జాతీయ అవార్డు దక్కినట్లు ప్రకటించారు. దేశంలోని మిగిలిన నగరాల్ని వెనక వేసి ఈ ఘనత దక్కించుకోవడంపై ముఖ్యమంత్రి వై.ఎస్‌.జగన్‌మోహన్‌రెడ్డి, పురపాలకశాఖ మంత్రి బొత్స సత్యనారాయణలు కమిషనర్, ఇతర అదికారులకు అభినందనలు తెలిపినట్లు జీవీఎంసీ పౌరసంబంధాల అధికారి ప్రకటించారు.

ప్రధానితో సమావేశానికి మహిళా కూలీ

కూలి పనులకు వెళ్లే ఓ పేదింటి మహిళ జనవరి 1న ప్రధాని నరేంద్ర మోదీతో జరిగే వీడియో కాన్ఫరెన్స్‌లో పాల్గొననున్నారు. ఇలాంటి అవకాశాన్ని కేంద్ర గృహ, పట్టణ వ్యవహారాల మంత్రిత్వశాఖ ఇచ్చింది. ఆమె పేరు సత్రబోయిన దుర్గ. గాజువాకలోని ఉప్పరకాలనీలో ఉంటున్నారు. ఈ పేద కుటుంబానికి ప్రధానిమంత్రి ఆవాస్‌యోజన పథకం కింద ప్రభుత్వం ఇంటిని మంజూరు చేసింది. పరిస్థితులు మెరుగుపడి, ఇప్పుడువారు మంచి జీవితానికి దగ్గరయ్యారని... అలాంటి దుర్గ కథ అందరికీ తెలియాలనే ఉద్దేశంతో ఆమెను ఉత్తమ లబ్ధిదారుగా ఎంపికచేసి ప్రధానితో వీడియోకాన్ఫరెన్స్‌కు ఆహ్వానించారు. వీరికి రూ.3.5లక్షలతో ఇల్లు మంజూరైంది. ఇందులో కేంద్రప్రభుత్వం రూ.1.50, రాష్ట్ర ప్రభుత్వం రూ.లక్ష సబ్సిడీ ఇచ్చాయి.

దుర్గ, అప్పన్నబాబు దంపతులు

'గతంలో మాకు ఓ గుడిసె ఉండేది. వానొచ్చిన, చలేసినా ఇబ్బందే. పైకప్పు అత్యంత బలహీనంగా ఉండేది. ఈ పరిస్థితుల్లో ప్రభుత్వం మాకు ఇంటిని మంజూరుచేసింది. ఇప్పుడు మా ఆర్థిక స్థితులు మెరుగుపడుతున్నాయి' అని దుర్గ వెల్లడించింది.

ఇదీ చదవండి