అర్ధరాత్రి అయితే చాలు హైవేపై ఆకతాయిలు బైక్లతో చక్కర్లు కొడుతున్నారు. రయ్ రయ్ మంటూ అతివేగంతో దూసుకెళ్తున్నారు. విజయవాడ నగర శివారుల్లోని రహదారిపై.. ఖరీదైన బైకులతో యువకులు రోడ్డెక్కుతున్నారు. మితిమీరిన వేగంతో ద్విచక్ర వాహనాలు నడుపుతున్నారు. సినిమా స్టంట్స్ తరహాలో బైక్లతో విన్యాసాలు చేస్తున్నారు. రోడ్లపై యువత హల్ చల్ చేస్తున్న వైనం ఆలస్యంగా వెలుగులోకి వచ్చింది. కంకిపాడు - విజయవాడ రహదారిలో యువకులు అర్ధరాత్రి సమయంలో ద్విచక్ర వాహనాలతో విన్యాసాలు చేస్తున్నారు. సుమారు పది మంది యువకులు బైక్ రేసింగ్లకు పాల్పడుతున్నట్లు సమాచారం.
బైక్ రేసులు, విన్యాసాలు చేస్తూ ఇతర వాహనదారులను భయాందోళనకు గురిచేస్తున్నారు. గతంలో కూడా ఇలాంటి ఘటనలు జరిగితే పోలీసులు బాధ్యులపై కేసులు నమోదు చేశారు. రోడ్డు ప్రమాదాల్లో మరణిస్తున్న వారిలో యువకులే అధికంగా ఉన్నట్లు లెక్కలు చెబుతున్నాయి. అయినా యువకులు రేసింగ్లకు పాల్పడుతూ..ప్రాణాలతో చెలగాటమాడుతున్నారు. రేసింగ్లపై సమాచారం అందుకున్న విజయవాడ సీపీ బి.శ్రీనివాసులు ట్రాఫిక్ పోలీసులు, పెనమలూరు పోలీసులను దర్యాప్తుకు ఆదేశించినట్లు సమాచారం.
ఇదీ చదవండి :
నివర్ తుపాన్: నెల్లూరు, రాయలసీమకు మోస్తరు నుంచి భారీ వర్ష సూచన
