దిశ హత్య కేసులో నిందితుల ఎన్కౌంటర్పై మీడియాలో వచ్చిన కథనాలను సుమోటోగా స్వీకరించి విచారణ చేపట్టిన జాతీయ మానవ హక్కుల కమిషన్... నిందితుల కుటుంబ సభ్యులను కూడా విచారించింది. రెండో రోజు సీనియర్‌ ఎస్పీ మన్‌జీత్‌ సైనీతో కూడిన ఏడుగురు సభ్యుల బృందం నిందితుల కుటుంబసభ్యుల నుంచి పలు వివరాలు అడిగి తెలుసుకుంది. ఈ విచారణకు దిశ హత్య కేసు ప్రధాన నిందితుడు ఆరీఫ్ తండ్రి హుస్సేన్, జొల్లు శివ తండ్రి రాజప్ప, చెన్నకేశవులు తండ్రి కురుమయ్య, నవీన్ తల్లి లక్ష్మీ హాజరయ్యారు. ఎన్కౌంటర్ గురించి అనుమానాలున్నాయా, నిందితుల కుటుంబాల ఆర్థిక పరిస్థితి, కుటుంబసభ్యులు ఏం చేస్తుంటారనే వివరాలు అడిగి తెలుసుకున్నారు. నిందితుల వ్యక్తిగత వివరాలను కూడా తెలుసుకున్నారు. ప్రస్తుతం వారి కుటుంబాలకు జీవనాధారమేమిటనే కోణంలోనూ పలు అంశాలు తెలుసుకున్నారు.
దిశ తండ్రి, సోదరిని ప్రశ్నించిన ఎన్హెచ్ఆర్సీ...
మరో వైపు దిశ తండ్రి, సోదరిని కూడా ఎన్హెచ్ఆర్సీ బృందం ప్రశ్నించింది. ఎన్కౌంటర్ గురించి ముందే తెలుసా, అసలు ఏం జరిగింది, మీకేమైనా సమస్యలున్నాయా, అంటూ గంట సేపు పాటు వారిని ప్రశ్నించి సమాచారం సేకరించారు. ఎన్కౌంటర్ గురించి టీవీల్లో చూసిన తర్వాతే తమకు తెలిసిందని, పోలీసుల నుంచి దీనిపై తమకు ఎటువంటి సమాచారం లేదని వారు కమిషన్ సభ్యులకు వివరించారు.
రిమాండ్లో ఉండగానే ఎన్ కౌంటర్ చేసి చంపడం న్యాయమా..?
ఎన్హెచ్ఆర్సీ బృందం అడిగిన ప్రశ్నలకు సమాధానాలు ఇచ్చిన నిందితుల కుటుంబ సభ్యులు ఎన్కౌంటర్పై తమ వాదనలు కూడా వినిపించారు. తమ బిడ్డలు చేసింది క్షమించరాని నేరమే అయినా... న్యాయ విచారణ జరగకుండానే, రిమాండ్లో ఉండగానే ఎన్ కౌంటర్ చేసి చంపడం న్యాయమా?... అని ఎన్హెచ్ఆర్సీ సభ్యుల ముందు తమ ఆవేదన వ్యక్తం చేశారు . కనీసం చివరిచూపునకు నోచుకోకుండా... అరెస్టు చేసినప్పటి నుంచి మాట కూడా మాట్లాడనివ్వకుండా చివరికి ప్రాణాలు తీసేసారని కమిషన్ ముందు వాపోయారు. ఎన్కౌంటర్ జరిగిన తీరుపైనా కుటుంబ సభ్యులు సందేహాలు వ్యక్తం చేసినట్లు తెలుస్తోంది.
ప్రభుత్వపరంగా న్యాయం జరిగేలా చూడాలి...
నిందితుల్లో ఒకరైన చెన్నకేశవులు భార్య రేణుక ప్రస్తుతం నిండు గర్భిణి. తల్లిదండ్రులు లేని అనాథ. ఉన్న భర్తను కూడా ఎన్కౌంటర్లో కోల్పోయింది. ప్రస్తుతం ఆమె భవిష్యత్తు ఏమిటని.. చెన్నకేశవులు తండ్రి కురుమయ్య కమిషన్ సభ్యులను ప్రశ్నించినట్లు తెలుస్తోంది. అత్తామామలమైనా తామూ నిరుపేదలమని ఒక్కగానొక్క కుమారున్ని కోల్పోయినట్లు వివరించారు. నిందితుల కుటుంబాలకు ప్రభుత్వ పరంగా న్యాయం జరిగేలా చూడాలని కమిషన్ను వేడుకున్నారు. మరోనిందితుడైనా నవీన్ తల్లి లక్ష్మీ కూడా తన కుటుంబ పరిస్థితిని కమిషన్ కు వివరించారు.
నేడు పోలీసులకు ప్రశ్నలు...
ఇవాళ జాతీయ మానవహక్కుల కమిషన్ పోలీసులను ప్రశ్నించే అవకాశముంది. ఎటువంటి పరిస్థితుల్లో ఎన్కౌంటర్ చేయాల్సి వచ్చింది? ఎదురు కాల్పులకు దారితీసిన పరిస్థితులు ఏంటి, అసలు ఆ సమయంలో నిందితులకు అక్కడికి ఎందుకు తీసుకువెళ్లారు, మీ చేతుల్లోంచి నిందితులు తుపాకులు ఎలా లాక్కున్నారు, మీ పై దాడి చేశారా అని నిందితుల వెంట ఉన్న పోలీసుల నుంచి వివరాలు సేకరించే అవకాశముంది.
హైకోర్టు తీర్పు వచ్చాకే అంత్యక్రియలు
ఎన్హెచ్ఆర్సీ విచారణ కోసం ఆదివారం తెల్లవారుజామునే కుటుంబ సభ్యులను హైదరాబాద్కు తీసుకు వెళ్లారు. అందరినీ కలిపి కాకుండా ఒక్కో కుటుంబం నుంచి ఒక్కొక్కరిని వేర్వేరుగా సభ్యులు విచారించారు. విచారణ పూర్తైన అనంతరం రాత్రి 7 గంటల తర్వాత పోలీసులు వారిని వారి స్వగ్రామాల్లో విడిచి వెళ్లారు. ఇవాళ చటాన్పల్లిలో దిశ హత్య నిందితుల ఎన్కౌంటర్పై దాఖలైన పిల్ పై నేడు హైకోర్టు విచారణ చేపట్టనుంది. హైకోర్టు ఆదేశాల మేరకే నిందితుల మృతదేహాలను పోలీసులు భద్రపరిచి ఉంచారు. వాటిని కుటుంబ సభ్యులకు ఎప్పుడు అప్పగిస్తారన్నది ఇవాళ్టి విచారణ అనంతరం తేలనుంది.
ఇవీ చూడండి: తను కన్నవారికీ... తనను కన్నవారికీ... తనే అమ్మ!
