పెరుగుతున్న కరోనా కేసులు...స్వచ్ఛందంగా వ్యాపారసంస్థల మూసివేత!

రాష్ట్రంలో ఒక్కరోజు వ్యవధిలో... రికార్డుస్థాయిలో కరోనా మరణాలు సంభవించాయి. కొత్తగా 43 మంది మృత్యువాత పడినట్లు.....వైద్య, ఆరోగ్య శాఖ వెల్లడించింది. ఒక్కరోజులో 19 వందల16 మందికి కొవిడ్ సోకినట్లు నిర్ధరించారు. మొత్తం బాధితుల సంఖ్య 33 వేలు దాటింది. వైరస్ తీవ్రతతో రాష్ట్రవ్యాప్తంగా అనేక ప్రాంతాల్లో... దుకాణదారులు, ప్రజలు స్వీయనియంత్రణ పాటిస్తున్నారు. మరికొన్ని చోట్ల అధికారులే ఆంక్షలు విధిస్తున్నారు.

రాష్ట్రంలో కరోనా రోజురోజుకూ ఉగ్రరూపం దాలుస్తోంది. వైరస్ ఒక్కరోజులోనే 43మందిని బలిగొంది. రెండ్రోజుల వ్యవధిలో ఏకంగా 80 మంది మృతి చెందారు. ఇంతకుముందెప్పుడూ ఇన్ని మరణాలు సంభవించలేదు. అనంతపురం జిల్లాలో అత్యధికంగా 10 మంది మరణించారు. పశ్చిమగోదావరి జిల్లాలో 9 మంది... చిత్తూరు, తూర్పుగోదావరి, కడప జిల్లాల్లో ఐదుగురు చొప్పున మృతి చెందారు. మహమ్మారి ధాటికి... ప్రకాశం జిల్లాలో ముగ్గురు, విశాఖలో ఇద్దరు, విజయనగరం జిల్లాలో ఒకరు మరణించారు. మొత్తంగా రాష్ట్రంలో కరోనా మృతుల సంఖ్య 408కి చేరింది.

రాష్ట్రవ్యాప్తంగా ఒక్కరోజు వ్యవధిలో 19 వందల 16 మందికి పాజిటివ్‌ వచ్చింది. కొత్తకేసులతో బాధితుల సంఖ్య 33 వేల 19కి పెరిగింది. చిత్తూరు జిల్లాలో అత్యధికంగా 238 మందికి వైరస్ సోకింది. శ్రీకాకుళం జిల్లాలో 215, పశ్చిమగోదావరి జిల్లాలో 199 కేసులు బయటపడ్డాయి. అనంతపురం జిల్లాలో కొత్తగా 185 మందికి కొవిడ్ పాజిటివ్‌గా నిర్ధరించారు. కర్నూలు జిల్లాలో 169, నెల్లూరు జిల్లాలో 165, తూర్పుగోదావరి జిల్లాలో 160 మందికి సోకింది. కొత్తగా 22 వేల మందికి పరీక్షలు నిర్వహించారు.

వైరస్ తీవ్రత ఎక్కువగా ఉన్న ప్రాంతాల్లో...వ్యాపారులు, దుకాణదారులు స్వచ్ఛందంగా వాణిజ్యసముదాయాలు మూసివేస్తున్నారు. మరికొన్నిప్రాంతాల్లో అధికారుల ఆదేశాలతో లావాదేవీలకు విరామమిచ్చారు. రోజుకు 5 కోట్ల రూపాయల వ్యాపారం జరిగే విజయవాడ శివారులోని గొల్లపూడి హోల్‌సేల్ మార్కెట్‌ను... సోమవారం నుంచి తెరవట్లేదు. వన్‌టౌన్‌లోని మార్కెట్‌ను ఈనెల 9 నుంచే మూసిఉంచారు.

తూర్పుగోదావరి జిల్లాలోనూ అదే పరిస్థితి కనిపిస్తోంది. రాజమహేంద్రవరం, కాకినాడ, కోనసీమల్లో ఆంక్షలు కొనసాగుతున్నాయి. ఉదయం 11 తర్వాత దుకాణాలు తెరవొద్దని అధికారులు ఆదేశించారు. యానాం సమీపంలోని తాళ్లరేవులో రొయ్యల శుద్ధిపరిశ్రమల్లో పనిచేసే ఒక మహిళ ద్వారా సుమారు 15మంది వరకు కరోనా బారిన పడ్డారు. పశ్చిమగోదావరి జిల్లా జీలుగుమిల్లిలో కరోనా కేసులు కలకలం రేపుతున్నాయి. విశాఖ పూర్ణా మార్కెట్‌లో... ఉదయం 9 నుంచి 12 వరకే కార్యకలాపాలు సాగుతున్నాయి.

కర్నూలు జిల్లా నంద్యాలలో ఇవాళ్టి నుంచి లాక్‌డౌన్ అమలు చేయనున్నారు. ఉదయం 6 నుంచి 12 గంటల వరకు.... కిరాణా సరుకులు, కూరగాయలకు మాత్రమే అనుమతిచ్చారు. అత్యవసర సేవలు మినహా... పూర్తిస్థాయి లాక్‌డౌన్ అమలు చేయనున్నారు. నంద్యాల పరిధిలోని పోలీసుస్టేషన్లో కొందరు సిబ్బందికి పాజిటివ్‌ రాగా...ఒకరు మృతిచెందారు. ప్రభుత్వ వైద్యశాలలో పనిచేస్తున్న కొందరు వైద్యులు, సిబ్బందికి కరోనా సోకింది. నూనెపల్లె ఎస్​బీఐలో ఏకంగా 10 మంది సిబ్బందికి పాజిటివ్ రావడంతో.... కార్యకలాపాలు 4 రోజుల కిందటే మూసివేశారు. కరోనా అలజడితో... కడప జిల్లాలోని పర్యాటక కేంద్రం గండికోట బోసి పోయింది.

ఇదీచదవండి