Bus ticket to Cock: ఆర్టీసీ బస్సులో ప్రయాణించేటప్పుడు చిన్నపిల్లలకు టికెట్లు తీసుకునే సమయంలో కండక్టర్ను.. కొంతమంది ప్రయాణికులు సతాయిస్తుంటారు. కానీ.. ఆ కండక్టర్ మాత్రం పట్టువదలకుండా.. ఆ చిన్నారులకు టికెట్ కొడతాడు. ఇంకొందరు కండక్టర్లు లగేజీ విషయంలోనూ రాజీ పడకుండా.. ఛార్జీలు వసూలు చేస్తారు. ఇదంతా ఓ ఎత్తైతే.. ఈ కండక్టర్ మాత్రం తగ్గేదెలే అంటూ.. ఓ కోడిపుంజుకు టికెట్ కొట్టాడు. ఈ విషయం ఇప్పుడు చర్చనీయాంశమైంది.
కోడికి రూ.30 టికెట్..
తెలంగాణలోని పెద్దపల్లి జిల్లా గోదావరిఖని డిపోకు చెందిన ఆర్టీసీ బస్సు.. గోదావరిఖని నుంచి కరీంనగర్ వెళ్తుంది. మహమ్మద్ అలీ అనే ప్రయాణికుడు.. బస్సెక్కాడు. కరీంనగర్ వెళ్లేందుకు టికెట్ తీసుకున్నాడు. అయితే అలీ తన వెంట ఓ కోడిపుంజును కూడా తెచ్చుకున్నాడు. బస్సు సుల్తానాబాద్ వద్దకు చేరుకున్నాక.. కండక్టర్ తిరుపతికి కోడిపుంజు శబ్దం వినిపించగా ఈ విషయాన్ని గమనించాడు. వెంటనే.. కోడికి రూ.30 టికెట్ కొట్టి అలీ చేతికిచ్చాడు కండక్టర్. ఆ టికెట్ చూసిన అలీ ఒక్కసారిగా షాక్ అయ్యాడు.
ప్రాణమున్న ప్రతీ జీవికి..
షాక్ నుంచి తేరుకుని కోడికి టికెట్ ఎంటని అడిగితే.. "ప్రాణం ఉన్న ప్రతీ జీవికి టికెట్ తీసుకోవాల్సిందే" అని ఆ కండక్టర్ చెప్పిన సమాధానానికి మళ్లీ అలీకి దిమ్మదిరిగిపోయింది. ఏమి చేయలేక టికెట్కు సరిపడా డబ్బులిచ్చి.. అలీ కరీంనగర్కు ప్రయాణమయ్యాడు.
డీఎం ఏమన్నాడంటే..
ఈ విషయం కాస్తా.. ఆ నోటా ఈ నోటా నానుతూ జిల్లా మొత్తం చర్చనీయాంశమైంది. దీనిపై స్పందించిన గోదావరిఖని డిపో మేనేజర్.. బస్సుల్లో మూగజీవాలకు అనుమతి లేదన్నాడు. మొదట తొందర్లో గమనించక కోడికి కండక్టర్ టికెట్ కొట్టలేదన్నాడు. తర్వాత గమనించి.. అధికారులు వస్తే తనకు ఇబ్బంది అవుతుందని తలచి టికెట్ తీసుకున్నాడని కండక్టర్ చేసిన పనిని సమర్థిస్తూ.. వివరణ ఇచ్చాడు.
సజ్జనార్ స్పందిస్తూ..
ఇక ఇదే అంశాన్ని నెటిజన్లు.. ఆర్టీసీ ఎండీ సజ్జనార్ దృష్టికి ట్విట్టర్ ద్వారా తీసుకెళ్లారు. దీనికి స్పందించిన సజ్జనార్.. ఈ ఘటనపై దృష్టి సారిస్తామని సమాధానమిచ్చారు.
ఆర్టీసీని జనాల్లోకి తీసుకెళ్లేందుకు యాజమాన్యం ఓవైపు కృషి చేస్తుంటే.. మరోవైపు ఇలా కోడికి, మేకకు టికెట్లు కొట్టుకుంటూ పోతే.. ప్రయాణికుల స్పందన ఎలా ఉంటుందో..? చూడాలి మరి..!
ఇదీ చూడండి:
