తెలంగాణ ఆర్టీసీ పట్టుబడుతున్నట్లుగా ఆ రాష్ట్ర పరిధిలో రోజూ..లక్ష 61వేల కిలోమీటర్ల మేర మాత్రమే సర్వీసులు నడిపేందుకు ఏపీఎస్ఆర్టీసీ సిద్ధమవుతోంది. నిత్యం లక్షా 4 వేల కిలోమీటర్ల మేర సర్వీసులు తగ్గించుకోనుంది. లాక్‌డౌన్‌ ముందు వరకు తెలంగాణ పరిధిలో ఏపీఎస్ఆర్టీసీ రోజు 2లక్షల 65వేల కిలోమీటర్లు, తెలంగాణ ఆర్టీసీ ఏపీ పరిధిలో లక్షా 61వేల కిలోమీటర్ల మేర బస్సు సర్వీసులు నడిపేవి. అన్‌లాక్‌ ప్రక్రియ ప్రారంభం తర్వాత ఇరురాష్ట్రాల మధ్య సర్వీసులు పునరుద్ధరణకు అంతర్రాష్ట్ర ఒప్పందం చేసుకోవాల్సిందేనని టీఎస్ఆర్టీసీ కోరుతోంది.
ఇందులో భాగంగా ఇరు ఆర్టీసీలు రోజూ లక్షా 61వేల కిలోమీటర్ల చొప్పునే నడపాలని షరతు విధించింది. ఇటీవల ఏపీఎస్ఆర్టీసీ అధికారులు 2లక్షల 8వేల కిలోమీటర్ల చొప్పున బస్సులు నడిపేందుకు ప్రతిపాదించినప్పటికీ తెలంగాణ అధికారులు అంగీకరించలేదు. చివరకు ఏపీఎస్ఆర్టీసీ అధికారులు లక్షా 61వేల కిలోమీటర్ల ప్రతిపాదనలు తయారుచేస్తున్నారు. ఏయే మార్గాల్లో ఎన్ని సర్వీసులు ఉంటాయనే జాబితా సిద్ధం చేస్తున్నారు. తాజా ప్రతిపాదనలతో ఏపీఎస్ఆర్టీసీ అధికారులు వచ్చే సోమ, మంగళవారాల్లో హైదరాబాద్‌లో టీఎస్ఆర్టీసీ అధికారులతో భేటీ కానున్నారు. ఏపీ ప్రతిపాదనతో తెలుగురాష్ట్రాల మధ్య అంతర్రాష్ట్ర ఆర్టీసీబస్సు సర్వీసులు తిప్పుకునేందుకు మార్గం సుగమం అవుతుందని భావిస్తున్నారు.
ఇదీచదవండి
