కర్నూలు జిల్లాలో..
- ద్విచక్ర వాహనం అదుపుతప్పి కిందపడిన ఓ కానిస్టేబుల్.. ఘటనాస్థలంలోనే మృతి చెందారు. కర్నూలులో మూడవ పట్టణ పోలీసు స్టేషన్ కు చెందిన కానిస్టేబుల్ జనార్థన్ విధులు ముగించుకొని సొంత ఊరు పసుపులకు బైక్ పై బయలుదేరారు. ఈ క్రమంలో వాహనం అదుపు తప్పి కిందపడింది. తీవ్రగాాయాలపాలైన ఆయన అక్కడికక్కడే చనిపోయారు. మృతుడుకి భార్య, ఇద్దరు కుమారులు ఉన్నారు.
- కర్నూలు సమీపంలోని నన్నూరు టోల్ గేటు వద్ద రోడ్డు ప్రమాదం జరిగింది. ఈ ప్రమదంలో తల్లీ కుమార్తెలు మరణించారు. స్థానిక మారుతి నగర్ కు చెందిన శంకరమ్మ (తల్లి) , దుర్గేశ్వరి(కుమార్తె) గిద్దలూరు నుంచి కారులో సొంతూరికి వస్తుండగా.. అదుపు తప్పి వాహనం టోల్ గేటు వద్ద స్థంభాన్ని ఢీకొట్టింది. ఈ ప్రమాదంలో తల్లి అక్కడికక్కడే మృతి చెందగా కుమార్తె ఆసుపత్రిలో చికిత్స పొందుతూ మరణించింది. కారు డ్రైవర్ తీవ్ర గాయాలతో ఆసుపత్రిలో చికిత్స పొందుతున్నాడు. ఈఘటన పై ఓర్వకల్లు పోలీసులు దర్యాప్తు చేస్తున్నారు.
గుంటూరు జిల్లాలో...
కొల్లూరు మండలంలో.. విధులకు వెళ్తూ ప్రాథమిక ఆరోగ్య కేంద్రం ఏఎన్ఎం రోడ్డు ప్రమాదంలో మృతి చెందారు. మేరీ గ్రెస్ (45) అనే ఎఎన్ఎం.. ఈపూరు లంక గ్రామంలో కరోన టెస్టులు చేసేందుకు భర్తతో కలిసి బైక్ మీద వెళ్తుండగా.. ఎదురుగా వస్తున్న మట్టి ట్రాక్టర్ వారిని ఢీకొట్టింది. ఈ ఘటనలో ఏఎన్ఎం ట్రాక్టర్ వెనుక చక్రం కింద పడడంతో తల పగిలి మృతి చెందారు. ఆమె భర్త స్వల్ప గాయాలతో బయటపడ్డారు. పోలీసులు మృతదేహాన్ని శవపరీక్ష కోసం తెనాలి ప్రభుత్వాసుపత్రికి తరలించారు.
శ్రీకాకుళం జిల్లాలో...
ఆమదాలవలస మండలం అక్కులపేట జంక్షన్ వద్ద రోడ్డు ప్రమాదం జరిగింది. వేగంగా వస్తున్న కారు ద్విచక్ర వాహనాన్ని ఢీకొట్టటంతో ఒక వ్యక్తికి తీవ్ర గాయాలయ్యాయి. కొత్తూరు మండల సచివాలయంలో పనిచేస్తున్న లోపింటి గిరిరాజా విధులు ముగించుకుని ద్విచక్ర వాహనంలో శ్రీకాకుళం వెళ్తుండగా.. ఎదురుగా వస్తున్న కారు ఢీకొట్టింది. అటుగా వెళ్తున్న వీరఘట్టం 108 వాహన సిబ్బంది స్పందించి బాధితుడికి ప్రథమ చికిత్స అందించి ఆసుపత్రికి తరలించారు. ప్రస్తుతం అతడి పరిస్థితి విషమంగా ఉన్నట్లు వైద్యులు తెలిపారు.
కృష్ణా జిల్లాలో...
నందిగామ సమీపంలోని 65వ జాతీయ రహదారిపై.. లోడుతో వెళుతున్న లారీ బోల్తా పడింది. కంచికచర్ల సమీపంలోని డివైడర్ను ఢీకొట్టిన కారణంగా ప్రమాదం జరిగింది. ఈ ఘటనలో డ్రైవర్ కు స్వల్ప గాయాలయ్యాయి.
ఇదీ చదవండి:
రాష్ట్ర ప్రభుత్వ చర్యలను అభినందించిన 'నోబెల్' గ్రహీత కైలాశ్‌ సత్యార్థి
