BJP leader Vishnuvardhan Reddy House arrest: కర్నూలు జిల్లా ఆత్మకూరులో జరిగిన ఘటనపై ముఖ్యమంత్రి వైఎస్.జగన్ మోహన్ రెడ్డి ఎందుకు స్పందించలేదని భాజపా రాష్ట్ర ప్రధాన కార్యదర్శి విష్ణువర్ధన్ రెడ్డి నిలదీశారు. ఘర్షణలో గాయపడిన వారిని పరామర్శించేందుకు వెళుతున్న విష్ణువర్ధన్ రెడ్డితో పాటు పలువురు నాయకులను కర్నూలులో పోలీసులు గృహనిర్బంధం చేశారు.
ఆత్మకూరులో శనివారం రాత్రి జరిగిన ఘటనను ఉగ్రవాద కోణంలో పోలీసులు విచారణ జరుపాలని విష్ణువర్ధన్ రెడ్డి డిమాండ్ చేశారు. బాధితులపై అక్రమ కేసులు పెడితే సహించేది లేదని హెచ్చరించారు. వైకాపా అధికారంలోకి వచ్చిన తర్వాత పోలీసులను స్వేచ్ఛగా పనిచేయనివ్వడంలేదని ఆరోపించారు. పోలీసులపై రాజకీయ జోక్యం లేకుండా స్వేచ్ఛగా విచారణ జరిపించాలని కోరారు. బుడ్డా శ్రీకాంత్ రెడ్డికి మెరుగైన వైద్యం అందించాలని కోరారు. ఆత్మకూరు ఘటనను కేంద్ర హోంశాఖ దృష్టికి తీసుకపోతామన్నారు.
ఆత్మకూరు పట్టణంలో పరిస్థితి అదుపులో ఉంది. శనివారం అల్లర్లకు పాల్పడిన వారిపై 5 కేసులు నమోదు చేసి... 28 మందిని అరెస్టు చేశాం. ఈ ఘటనలో ఓ కారు సహా మూడు ద్విచక్ర వాహనాలు దగ్ధమయ్యాయి. శాంతి భద్రతలకు విఘాతం కలిగిస్తే ఊరుకునేది లేదు. ఎవరూ ఆందోళన చెందాల్సిన అవసరం లేదు. -సుధీర్ కుమార్ రెడ్డి , కర్నూలు ఎస్పీ
అసలు ఏం జరిగిందంటే..
ఆత్మకూరు పట్టణంలో ఉద్రిక్త వాతావరణం నెలకొంది. ఓ నిర్మాణం విషయంలో సాయంత్రం రెండు వర్గాల మధ్య ఘర్షణ చోటు చేసుకోవటంతో.. రాళ్లు రువ్వుకున్నారు. అదే సమయంలో అక్కడికి వచ్చిన భాజపా నేత బుడ్డా శ్రీకాంత్ రెడ్డిని ఓ వర్గంవారు అడ్డుకున్నారు. ఈ క్రమంలో శ్రీకాంత్ రెడ్డి కారు ఒక్కసారిగా మనుషులపైకి వెళ్లటంతో ఇద్దరికి తీవ్రగాయాలయ్యాయి. దీంతో ఆగ్రహానికి గురైన మరో వర్గం.. శ్రీకాంత్ రెడ్డి కారును ధ్వంసం చేశారు. పరిస్థితిని అదుపుచేసేందుకు పోలీసులు.. గాల్లోకి రెండు రౌండ్లు కాల్పులు జరిపారు. ఈ ఘటనలో పలువురికి గాయాలయ్యాయి. అనంతరం ఆత్మకూరు పట్టణానికి పెద్ద ఎత్తున పోలీసులు చేరుకున్నారు. నేటి ఉదయం డ్రోన్ కెమెరాలతో పట్టణానాన్ని పర్యవేక్షించారు.
ఇదీ చదవండి: Tension at Atmakur: భాజపా నేత బుడ్డా శ్రీకాంత్‌రెడ్డి పర్యటనలో ఉద్రిక్తత.. గాల్లోకి కాల్పులు
