రాష్ట్రంలో రోజురోజుకీ కరోనా విజృంభిస్తున్న తరుణంలో డిగ్రీతో పాటు ఇతర వృత్తివిద్యా కోర్సుల ఆఖరి సంవత్సరం పరీక్షలు రద్దు చేయాలని జనసేన అధ్యక్షుడు పవన్ కల్యాణ్ డిమాండ్ చేశారు. పరిస్థితి ఆందోళనకరంగా మారుతుందన్న పవన్... ఈ పరిస్థితుల్లో పరీక్షలు నిర్వహించడం మంచిది కాదన్నారు. విద్యార్థులను ఉత్తీర్ణులుగా ప్రకటించాలని కోరారు. పదో తరగతి పరీక్షలు రద్దు చేసి ఉత్తీర్ణత ప్రకటించిన విధంగానే డిగ్రీతోపాటు ఎం.బి.ఎ, ఏజీ బీఎస్సీ, ఇంజినీరింగ్, పాలిటెక్నిక్, ఐ.టీ.ఐ., కోర్సుల చివరి సెమిస్టర్ పరీక్షలు రద్దు చేయాలన్నారు. విద్యార్థులంతా తమ కళాశాలలు ఉన్న పట్టణాలు, నగరాలకు వెళ్ళడం, అక్కడ హాస్టళ్లలో ఉండి పరీక్షా కేంద్రాలకు వెళ్లి రావడం ప్రమాదకరమని అభిప్రాయపడ్డారు.
పై చదువులకు వెళ్లేవారికి, క్యాంపస్ సెలెక్షన్స్లో ఎంపికైన వారికి ధ్రువపత్రాలకు సమయం దగ్గరపడుతోందని... పరీక్షలు లేని కారణంగా పట్టాలు చేతికి రాలేదని విద్యార్థులు ఆందోళన చెందుతున్నారని అన్నారు. లక్షల మంది విద్యార్థుల భవిష్యత్తును దృష్టిలో ఉంచుకుని ప్రభుత్వం పరీక్షలు రద్దు చేసి ఉత్తీర్ణతను ప్రకటించాలని కోరారు. ఇప్పటికే మహారాష్ట్ర, ఒడిశా రాష్ట్రాల్లో డిగ్రీ చివరి సంవత్సరం పరీక్షలు రద్దు చేసిన విషయం గుర్తు చేశారు. విద్యార్థుల ఆరోగ్యం, వారి భవిష్యత్తును దృష్టిలో ఉంచుకుని విశ్వ విద్యాలయాలు తగిన ప్రత్యామ్నాయ చర్యలు చేపట్టాలని విజ్ఞప్తి చేశారు.
ఇదీ చదవండి:
రాష్ట్రంలో పోలీసు రాజ్యం.. కేంద్ర మంత్రి చెప్పింది నిజం: సోమిరెడ్డి
