ఆకలి చూపులు...వలస కూలీల అవస్థలు

రెక్కాడితే తప్ప డొక్కాడని బతుకులు వారివి. కడుపు నిండాలంటే ఏ పూటకు ఆపూట చెమటోడ్చాల్సిందే.. కష్టపడేందుకు ఎన్నడూ వెన్ను చూపరు. కానీ లాక్‌డౌన్‌ వారి జీవనాన్ని అయోమయం చేసింది. పనుల్లేక, పొట్ట నింపుకునే దారిలేక, రోజు కూలీలు పడుతున్న అవస్థలు వర్ణణాతీతం.

'ఒక్క పూట అన్నం కోసం ఎదురుచూడటం అంటూ.....ఆ మధ్య వచ్చిన ఓ సినిమా పాట ఇప్పుడు లాక్‌డౌన్‌ చట్రంలో చిక్కుకున్న రోజువారీ కూలీల కష్టాలకు అద్దంపడుతోంది. గుంటూరు శివార్లలోని సుశాంక గోయల్‌, కృష్ణబాబు, గంగిరెద్దుల కాలనీల్లో.. ఎక్కువగా కూలిచేసుకునే పేదలే నివసిస్తుంటారు. వీరికి సాధారణ రోజుల్లోనే ఒక్కోసారి ఉపాధి దొరకదు. లాక్‌డౌన్‌ కారణంగా పూర్తిగా పనుల్లేకపోవడంతో పరిస్థితి మరింత దిగజారింది. ఆదాయంలేక ఆహారం, నిత్యావసరాలిచ్చే దాతల కోసం ఆశగా ఎదురుచూస్తున్నారు.

ప్రభుత్వం ఆదుకోవాలి

ప్రభుత్వం అందిస్తున్న ఆర్థికసాయం, నిత్యావసరాలు అందరికీ అందట్లేదని... ఆయా కాలనీ వాసులు ఆరోపిస్తున్నారు. తమ ఆకలి తీర్చేందుకు ప్రభుత్వం వెంటనే చర్యలు చేపట్టాలని కోరుతున్నారు.

ఇదీ చదవండి : ఇక ప్రభుత్వ భవనాలకు ఆ రంగులే...!