రాష్ట్ర ఆర్థిక పరిస్థితి బాగానే ఉన్నప్పటికీ ఉద్యోగుల జీతాల్లో కోత విధించం, వ్యవసాయ ఉత్పత్తుల కొనుగోలు చేయకపోవటంపై తెదేపా నేత, మాజీ ఎమ్మెల్యే ధూళిపాళ్ల నరేంద్ర ప్రభుత్వాన్ని తప్పుబట్టారు. ఈ విషయమై సీఎం జగన్కు ఆయన బహిరంగ లేఖ రాశారు.
ప్రభుత్వ ఖజానాలో గత ఏడాది కన్నా రూ.30 వేల కోట్లు అదనంగా ఉన్నా.. పంటల కొనుగోలు, కరోనా నివారణ చర్యలు ఎందుకు చేపట్టడం లేదని ధూళిపాళ్ల నరేంద్ర ప్రశ్నించారు. ఆక్వా, పౌల్ట్రీ, ఉద్యానవన ఉత్పత్తులను ఎందుకు కొనుగోలు చేయటంలేదని ప్రశ్నించారు. మార్కెట్ ఇంటర్వెన్షన్ నిధులతో పంటలు కొనుగోలు చేస్తామని బడ్జెట్ సమావేశాల్లో చెప్పిన ప్రభుత్వం ఇప్పుడెందుకు ఆ పని చేయటం లేదని నిలదీశారు. ధాన్యం కొనుగోలుపై సీఎం జగన్ కనీసం ఒక్క ప్రకటన కూడా చేయకపోవటం సరికాదన్నారు. ప్రభుత్వ ఖజానా నిధులపై గోప్యం ఎందుకు పాటిస్తున్నారని ప్రశ్నించారు.
నిధులిచ్చినా ఎందుకు కోతలు?
అన్ని రాష్ట్రాల్లో ప్రభావం ఉన్నా ఉద్యోగుల వేతనాల్లో కోతలు లేవన్న నరేంద్ర.. రాష్ట్రంలో ఎందుకు కోతలని ప్రశ్నించారు. వేతనాల్లో కోత విధించడం ప్రభుత్వ వైఫల్యానికి నిదర్శనమన్నారు. గతంలో రూ.16 వేల కోట్లు లోటు బడ్జెట్ ఉన్న సమయంలోనే హుద్ హుద్ వంటి ప్రళయం వచ్చినా చంద్రబాబు ఎప్పుడూ ఉద్యోగుల జీతాల్లో కోతపెట్టలేదని గుర్తుచేశారు. ఆర్థిక సంఘం కేటాయింపుల ప్రకారం స్థానిక సంస్థలకు నిధులు ఇచ్చినా... ఉద్యోగుల వేతనాల్లో కోతలు పెట్టడాన్ని ఆయన తప్పుబట్టారు. కావాలనే ఆర్థిక వ్యవస్థ సంక్షోభంలో ఉందని చూపుతున్నారని విమర్శించారు. ప్రభుత్వం తీసుకున్న వేతనాల కోత నిర్ణయాన్ని పునఃసమీక్షించాలని డిమాండ్ చేశారు.
ఇదీ చదవండి:
