Student missing: గుంటూరు జిల్లా దుగ్గిరాలకు చెందిన ఇంటర్ విద్యార్థి కొల్లి సాంబశివరావు బకింగ్ హామ్ కెనాల్లో ఈతకు దిగి గల్లంతయ్యాడు. మంగళవారం సాయంత్రం ఏడుగురు స్నేహితులంతా కలిసి కాలువలో స్నానానికి దిగారు. కాసేపటి తరువాత సాంబశివరావు గల్లంతయ్యాడు. దీంతో మిగిలిన స్నేహితులు భయంతో ఇంటికి వెళ్లిపోయారు. ఈ విషయాన్ని దాచిపెట్టారు. మంగళవారం సాయంత్రం నుంచి సాంబశివరావు కోసం తల్లిదండ్రులు దుగ్గిరాలలో గాలించారు. అతని స్నేహితులను అడిగినా.. తమకు తెలియదని చెప్పారు. సాంబశివరావు చరవాణికి ఫోన్ చేసినా స్పందన రాకపోవడంతో తల్లిదండ్రులు ఆందోళన వ్యక్తం చేశారు.
బుధవారం ఉదయం కాలువ సమీపానికి వెళ్లిన కొంతమందికి సాంబశివరావు దుస్తులు, చరవాణి కనిపించడంతో పోలీసులకు సమాచారం ఇచ్చారు. దీంతో స్నేహితులను గట్టిగా నిలదీయగా అసలు విషయం చెప్పారు. తామంతా నిన్న సాయంత్రం కాలువలో స్నానానికి దిగామని.. సాంబశివరావు గల్లంతు కావడంతో భయంతో ఇంటికి తిరిగి వచ్చేశామన్నారు. విషయం తెలుసుకుని తల్లిదండ్రులు విషాదంలో మునిగిపోయారు. గల్లంతైన సాంబశివరావు కోసం పోలీసులు గాలింపు చర్యలు చేపట్టారు.
ఇవీ చదవండి:
