తన కుమార్తె ప్రేమించి పెళ్లి చేసుకుందని.. మంత్రి తానేటి వనిత గన్మెన్ చంద్రారావు రోడ్డుపై వీరంగం సృష్టించాడు. పశ్చిమ గోదావరి జిల్లా ఏలూరులోని ఎస్పీ కార్యాలయం సమీపంలో కుమార్తె గాయత్రి, అల్లుడు కిరీటిపై దాడి చేశాడు. గాయత్రి, కిరీటి అరుస్తున్నా... ఇవేమీ పట్టించుకోకుండా దాడికి ప్రయత్నించాడు.
ఐదు నెలల కిందట తానేటి వనిత గన్మెన్ చంద్రారావు కుమార్తె గాయత్రి, కిరీటీ ప్రేమ వివాహం చేసుకున్నారు. అప్పటినుంచి చంద్రారావు వారిపై కోపం పెంచుకున్నాడు. ఈ క్రమంలోనే దాడి చేశాడు. ఈ విషయం ఎస్పీ దృష్టికి వెళ్లగా.. చంద్రారావుపై కేసు నమోదు చేసి.. చర్యలు తీసుకోవాలని ఆదేశాలు జారీ చేశారు. గతంలోనూ.. ఈ జంటపై దాడి జరిగినట్లు తెలుస్తోంది. కొవ్వూరు మండలంలో గ్రామ సచివాలయంలో పని చేస్తున్న తనను... చంద్రారావు పరపతి ఉపయోగించి.. ఏలూరుకు బదిలీ చేయించినట్లు గాయత్రి ఆరోపిస్తోంది. తండ్రి నుంచి తమకు ప్రాణహానీ ఉందని.. రక్షణ కావాలని కోరుతోంది.
ఇదీ చదవండి: జాగ్తే రహో: ఛార్జింగ్ పెడితే బ్యాంక్ ఖాతా ఖాళీ!
