Woman Suicide in Bharatnagar : ఎక్కువగా ఫోను మాట్లాడుతోందని అత్త మందలించడంతో నవ వధువు ఆత్మహత్య చేసుకుంది. ఈ సంఘటన తెలంగాణ రాష్ట్రం హైదరాబాద్‌ నగరంలోని ఎస్సార్‌నగర్‌ పోలీసుస్టేషన్‌ పరిధిలోని చోటు చేసుకుంది. బోరబండలోని భరత్‌నగర్‌కు చెందిన పవన్‌తో సికింద్రాబాద్‌ అడిక్మెట్కు చెందిన శిల్ప(22)కు మూడు నెలల క్రితం వివాహం జరిగింది. పెళ్లి తర్వాత శిల్ప అత్తారింటికి వెళ్లింది. మొదట్లో అంతా బాగానే ఉన్నా.. నెమ్మది నెమ్మదిగా అత్తాకోడళ్ల మధ్య చిన్నచిన్న తగాదాలు మొదలయ్యాయి. ఈ క్రమంలో ఒక రోజు.. ఎక్కువగా ఫోన్ మాట్లాడుతున్నావని అత్త కోడలిని మందలించింది. ఈ విషయంలో అత్తాకోడళ్ల మధ్య వివాదం చెలరేగింది.
అత్తారింట్లో సర్దుకుపోవడానికి ప్రయత్నిస్తున్న శిల్పకు అత్త మందలింపు మనస్తాపానికి గురి చేసింది. పుట్టింటిపై బెంగ ఓ వైపు.. అత్త మందలింపు మరోవైపు.. ఆమెను మనోవేదనకు గురి చేశాయి. ఈ క్రమంలో శిల్ప ఇంట్లో ఎవరూ లేని సమయంలో ఉరేసుకొని ఆత్మహత్యకు పాల్పడింది. గమనించిన కుటుంబ సభ్యులు పోలీసులకు సమాచారం అందించారు. కేసు నమోదు చేసుకొని పోలీసులు దర్యాప్తు చేస్తున్నారు. శిల్ప గర్భం దాల్చినట్లు సమాచారం.
- ఇదీ చదవండి :
అక్రమంగా భూమి కాజేశారు.. తప్పించుకోడానికి సినిమా ప్లాన్ వేశారు !
