RUSSIA UKRAINE WAR NEWS: అత్యవసరం అయితే తప్ప తమను బయటకు వెళ్లొద్దని అధికారులు సూచించారని ఉక్రెయిన్లోని తెలుగు విద్యార్థిని లక్ష్మీ శ్రీలేఖ తెలిపారు. ఉక్రెయిన్‌పై రష్యా యుద్ధం నేపథ్యంలో ‘ఈనాడు-ఈటీవీ భారత్' తో ఆమె మాట్లాడి అక్కడి పరిస్థితులను తెలిపారు. రాజధాని కీవ్ వైపు మాత్రం ప్రయాణాలు చేయొద్దని.. జాగ్రత్తగా ఉండాలని చెప్పారని ఆమె వివరించారు. 10 రోజులకు సరిపడా నిత్యావసరాలను ఇంట్లో ఉంచుకోవాలని అధికారులు సూచించారన్నారు.
"మా యూనివర్సిటీలో సుమారు 500 మంది తెలుగు విద్యార్థులు ఉన్నారు. ఈనెల 25, 26 తేదీల్లో భారత్కు వచ్చే విమానాలు రద్దు అయ్యాయి. భారత రాయబార కార్యాలయ అధికారులు మాతో మాట్లాడారు. కేంద్ర ప్రభుత్వంతో మాట్లాడి విద్యార్థులందరినీ తరలిస్తామని చెప్పారు. బయటకు వెళ్లేటప్పుడు పాస్‌పోర్టు ఉంచుకోవాలని సూచించారు. తాత్కాలికంగా ఉక్రెయిన్‌ను వీడి రావాలని భారత ప్రభుత్వం చేసిన సూచన మేరకు చాలామంది స్వదేశానికి బయల్దేరుతున్నారు. మార్చి 10 వరకు ఉన్న టికెట్లన్నీ బుక్ అయిపోయాయి" అని లక్ష్మీ శ్రీలేఖ వివరించారు.
ఇండియన్ ఎంబసీ నుంచి సరైన స్పందన లేదు..
ఇండియన్ ఎంబసీ నుంచి సరైన స్పందన లేదని విశాఖకు చెందిన మరో తెలుగు విద్యార్థిని శ్రీజ వెల్లడించారు. కీవ్ ప్రాంతానికి 500 కి.మీ. దూరంలో ఉన్నామని ఇక్కడ చాలా భయనక పరిస్థితులు నెలకొన్నాయని తెలిపారు. తాము బుక్ చేసుకున్న చార్టర్ విమానాలను రద్దు చేసినట్లు శ్రీజ వెల్లడించారు.
"కీవ్ ప్రాంతానికి 500 కి.మీ. దూరంలో ఉన్నాం. కావాల్సిన సామాన్లు కొనుక్కుని తెచ్చుకున్నాం. అత్యవసరమైతే మెట్రో అండర్‌గ్రౌండ్‌కు తీసుకెళ్తామన్నారు. ప్రత్యేక విమానాలు ఏర్పాటు చేసి మమ్మల్ని తీసుకెళ్లాలి. కీవ్ విమానాశ్రయానికి వెళ్లినవారు తిరిగివస్తున్నారు. కీవ్ సమీప ప్రాంతాల్లో చాలా భయంగా ఉంది. మేం బుక్ చేసుకున్న చార్టర్డ్ విమానాలు రద్దు చేశారు. ఇండియన్ ఎంబసీ నుంచి సరైన స్పందన లేదు." -శ్రీజ, తెలుగు విద్యార్థిని
వీడియో కాల్లో మాడ్లాడిన ఎంపీ రామ్మోహన్
ఉక్రెయిన్లో శ్రీకాకుళం జిల్లాకు చెందిన ఇద్దరు వైద్య విద్యార్థులు చిక్కుకున్నారు. వారితో ఎంపీ కింజారపు రామ్మోహన్ నాయుడు వీడియో కాల్లో మాట్లాడారు. అక్కడి పరిస్థితులను విద్యార్థులు ఎంపీకి వివరించారు. భవిష్యత్తులో ఆహారానికి కూడా ఇబ్బందులు ఉండే అవకాశం ఉందని విద్యార్థులు వాపోయారు. ఉక్రెయిన్లో చిక్కుకున్న విద్యార్థుల కోసం కేంద్ర మంత్రిత్వ శాఖతో మాట్లాడి వారిని స్వదేశానికి రప్పించేందుకు కృషి చేస్తానని ఎంపీ హామీ ఇచ్చారు.
ఆందోళనలో తల్లిదండ్రులు..
ఉక్రెయిన్లో యుద్ధం ప్రారంభం కావడంతో అక్కడ చదువుతున్న విద్యార్థుల తల్లిదండ్రులు తీవ్ర ఆందోళన వ్యక్తం చేస్తున్నారు. తన బిడ్డల క్షేమ సమాచారం కోసం ఆరా తీస్తున్నారు. ప్రభుత్వం జోక్యం చేసుకొని తన పిల్లలను స్వదేశానికి రప్పించేలా చర్యలు తీసుకోవాలని కోరుతున్నారు. సుమారు 2వేల మంది తెలంగాణ విద్యార్థులు ఉక్రెయిన్లో ఉన్నారు.
కరీంనగర్ జిల్లా రామడుగు మండలం రామచంద్రాపూర్ గ్రామానికి చెందిన ఎంబీబీఎస్ విద్యార్థిని కడారి సుమాంజలి ఉక్రెయిన్ రాజధాని కీవ్ నగరంలో చిక్కుకుందని ఆమె తండ్రి కడారి రాజయ్య తెలిపారు. ఉక్రెయిన్లో గత ఏడేళ్లుగా ఆమె చదువుతున్నట్లు చెప్పారు. అయితే ఆ దేశంలో పరిస్థితి ఆందోళనకరంగా మారడంతో భారత్కు వచ్చేందుకు సిద్ధమైందని రాజయ్య తెలిపారు. కీవ్ నగరానికి చేరుకొనే సరికే.. యుద్ధం ప్రారంభమైందని.. దాంతో ఎయిర్పోర్ట్లోనే చిక్కుకున్నట్లు తమకు ఫోన్ చేసి చెప్పిందని ఆమె తండ్రి చెప్పారు. తన కుమార్తెతో పాటు మరో 20 మంది భారతీయ విద్యార్థులు ఎయిర్పోర్టులోనే చిక్కుకున్నట్లు చెప్పిందని రాజయ్య చెప్పారు. ప్రస్తుతం క్షేమంగానే ఉన్నా.. తినేందుకు ఆహారం లేదందని రాజయ్య ఆందోళన వ్యక్తం చేశారు. ప్రభుత్వం వెంటనే స్పందించి తమ వారిని స్వదేశానికి రప్పించేందుకు చర్యలు తీసుకోవాలని కోరుతున్నారు.
'ఇండియాకు వచ్చేందుకు ఫ్లైట్ టికెట్లు బుక్ చేసుకుంది. ఎయిర్పోర్టుకు వచ్చేసరికే పరిస్థితి ఆందోళకరంగా మారింది. దాంతో ఎయిర్పోర్టులోనే చిక్కుకుపోయింది. మొత్తం 20 మంది భారతీయ విద్యార్థులు చిక్కుకున్నట్లు చెప్పింది. క్షేమంగానే ఉన్నా.. ఆహారం, నీళ్లు అందుబాటులో లేవని చెప్పింది.'
- కడారి రాజయ్య, సుమాంజలి తండ్రి
ఉక్రెయిన్లో బోధన్ విద్యార్థి..
నిజామాబాద్ జిల్లా బోధన్ పట్టణానికి చెందిన నరేందర్బాబు కుమారుడు వినయ్ ఉక్రెయిన్లో చదువుతున్నాడు. ఓజోరాన్ యూనివర్సిటీలో ఎంబీబీస్ తృతీయ సంవత్సరం చదువుతున్నట్లు ఆయన తండ్రి చెప్పారు. తమ కుమారుడు ఈ రోజు ఉదయం ఫోన్ చేశాడని.. ప్రస్తుతం తమ కుమారుడు ఉంటున్న ప్రాంతంలో పరిస్థితి బాగానే ఉందని చెప్పినట్లు తెలిపారు. గంట గంటకు పరిస్థితి ఆందోళనకరంగా మారుతున్న నేపథ్యంలో.. కేంద్ర ప్రభుత్వం వెంటనే స్పందించి తన కుమారుడిని స్వదేశానికి రప్పించాలని కోరుతున్నారు.
'మా కుమారుడు వినయ్ ఉక్రెయిన్లో ఎంబీబీఎస్ మూడో సంవత్సవం చదువుతున్నాడు. యుద్ధ భయాలతో ఫ్లైట్ టికెట్లు బుక్ చేసుకున్నారు. యుద్ధం ప్రారంభం కావడంతో ఫ్లైట్స్ క్యాన్సిల్ అయ్యాయి. ప్రస్తుతానికి ఇబ్బంది లేదని, సురక్షితంగానే ఉన్నామని చెప్పాడు.'
- నరేంద్రబాబు, వినయ్ తండ్రి
ఎంపీ బండి సంజయ్కు ఫోన్..
ఉక్రెయిన్ రాజధాని కీవ్ ఎయిర్పోర్టులో తెలుగు రాష్ట్రాలకు చెందిన విద్యార్థులు చిక్కుకుపోయారు. భారత్ వచ్చేందుకు విమానం టికెట్టు బుక్ చేసుకున్న వారంతా ఎయిర్పోర్టుకు చేరుకున్నారు. అయితే అంతలోనే యుద్ధం ప్రారంభం కావడంతో ఉక్రెయిన్ తన గగన తలాన్ని మూసివేసింది. గగన తలాన్ని డేంజర్ జోన్గా ప్రకటించింది. ఎయిర్పోర్టు నుంచి బయటకు వెళ్లే దారులను మూసివేసింది. దీంతో విద్యార్థులంతా ఎయిర్పోర్టులోనే ఉండిపోయారు. ఉక్రెయిన్లోని జాఫ్రోజియా యూనివర్సిటీలో ఎంబీబీఎస్ చదువుతున్నారు.
భారత్కు రాలేక.. తిరిగి యూనివర్సిటీకి వెళ్లలేక ఇబ్బందులు పడుతున్నట్లు.. కరీంనగర్కు చెందిన విద్యార్థులు భాజపా రాష్ట్ర అధ్యక్షుడు బండి సంజయ్కు ఫోన్ చేశారు. తమ సమస్యలను వివరించారు. విద్యార్థుల సమస్యపై వెంటనే స్పందించిన ఎంపీ సంజయ్.. వెంటనే కేంద్ర విదేశాంగ శాఖ మంత్రికి లేఖ రాశారు. విద్యార్థులందరినీ స్వదేశానికి రప్పించాలని విన్నవించారు.
ఇదీ చదవండి: 'ఇప్పటికే ఆలస్యమైంది.. ఎలాగైనా యుద్ధాన్ని ఆపండి'
