పొక్సో చట్టాన్ని పటిష్ఠం చేసేందుకు తెలంగాణ నడుం బిగించింది. రాష్ట్రవ్వాప్తంగా నమోదయ్యే కేసులను హైదరాబాద్ నుంచే పర్యవేక్షణ, సహకారం అందించాలని నిర్ణయించింది. హైదరాబాద్లో మహిళా భద్రత విభాగం సిబ్బంది క్రైమ్ అండ్ క్రిమినల్ ట్రాకింగ్ నెట్‌వర్క్ సిస్టమ్ డేటాను పరిశీలిస్తూ పోక్సో కేసుల గురించి ఆరా తీస్తారు. కేసు తీవ్రతను అనుసరించి దర్యాప్తు అధికారులకు తగు సూచనలు చేస్తారు. మహిళా భద్రత విభాగంలోని నిపుణులు వీరికి సహకరిస్తారు. ఈమేరకు తెలంగాణ మహిళా భద్రత విభాగం ఐజీ స్వాతిలక్రా అవసరమైన కార్యాచరణ రూపొందించారు.
న్యాయస్థానంలో కేసులు వీగిపోకూడదు...
పొక్సో కేసుల్లో శిక్షల శాతం పెంచడమే లక్ష్యంగా ఈ కసరత్తును ప్రారంభించినట్లు స్వాతిలక్రా తెలిపారు. చిన్నారులపై లైంగిక దాడుల విషయాన్ని తీవ్రంగా పరిగణిస్తూ ఈ కార్యాచరణకు శ్రీకారం చుట్టారు. ఎంత సంచలనం సృష్టించిన కేసైనా దర్యాప్తు సరిగ్గా లేకపోతే న్యాయస్థానంలో వీగిపోయే అవకాశముంటుంది. అందుకే దర్యాప్తు అధికారులకు అవసరమైన మెలకువల్ని అందించాలని స్వాతిలక్రా నిర్ణయించారు.
కరీంనగర్‌లో మొదటి శిక్షణ తరగతులు...
ఈ క్రమంలో పోలీస్ యూనిట్ల వారీగా ఈ సదస్సులు నిర్వహించనున్నారు. తొలుత కరీంనగర్ కమిషనరేట్ పరిధిలోని దర్యాప్తు అధికారులకు డిసెంబర్ 7న కరీంనగర్లోనే శిక్షణ ఇవ్వనున్నారు. అనంతరం వీలును బట్టి మిగిలిన యూనిట్లలోనూ ఈ సదస్సులు జరపనున్నారు. వరంగల్‌లో ఇటీవలికాలంలో సంచలనం సృష్టించిన 9నెలల చిన్నారిపై అత్యాచారం, హత్య ఘటనలో నెలన్నర రోజుల్లోనే నిందితుడికి శిక్ష వేయించేలా దర్యాప్తు చేయడాన్ని శిక్షణ సందర్భంగా ఊటంకించనున్నారు. ఆ కేసుతోపాటు అలాంటి కేసుల్లో దర్యాప్తు చేసిన తీరును వివరించనున్నారు. అలాగే కేసుల్ని ఫాస్ట్ ట్రాక్ కోర్టులో విచారించేందుకు చట్టపరంగా చేపట్టాల్సిన చర్యల గురించి అవగాహన కల్పిస్తారు.
ఇవీచూడండి: టీ హబ్లో ఎన్పీసీఐ ఇన్నోవేషన్ ల్యాబ్ ప్రారంభం
