సాధారణ ఎన్నికలతో పోల్చితే స్థానిక సంస్థల సంగ్రామం ప్రతిష్ఠాత్మకంగానే ఉంటుంది. వార్డుల్లోని ప్రతి ఇంటి ఓట్లను తమకే దక్కాలని ఆయా పార్టీల అభ్యర్థులు ప్రణాళికలు వేసుకుంటుంటారు. విజయం సాధించేందుకు ఎంతటి ఖర్చుకైనా వెనుకాడరు. రాష్ట్ర వ్యాప్తంగా జరగనున్న పంచాయతీ ఎన్నికల్లో భారీస్థాయిలో ఖర్చుపెట్టడానికి సిద్ధంగా ఉన్న అభ్యర్థులు ఎంతోమంది ఉన్నారు. కానీ రాష్ట్ర ఎన్నికల కమిషన్‌ ఇచ్చిన నిబంధనల ప్రకారమే వారు నడుచుకోవాలి. అభ్యర్థులు ఖర్చుపెట్టే ప్రతి రూపాయిని లెక్కచెప్పాల్సిందే. దానికి అనుగుణంగానే ఖర్చు చేయాల్సి ఉంటుంది. సర్పంచి అభ్యర్థితోపాటు, వార్డు సభ్యులకు సైతం ఈ నిబంధనలు వర్తిస్తాయి.
ఎవరెవరు ఎంత ఖర్చుపెట్టాలి..?
పదివేలకుపైగా జనాభా ఉన్న పంచాయతీల్లో పోటీచేస్తున్న సర్పంచి అభ్యర్థి రూ.2.50 లక్షలు, పదివేలలోపు జనాభా ఉన్న పంచాయతీల్లో రూ.1.50 లక్షల వరకు ఖర్చు చేసుకునే అవకాశం ఉంది. అదేవిధంగా వార్డు సభ్యులుగా పోటీచేసే పంచాయతీల్లో జనాభా పదివేలకుపైగా ఉంటే రూ.50 వేలు, అంతకంటే తక్కువ ఉంటే రూ.30 వేలు మాత్రమే వ్యయం చేయాలి.
నామినేషన్లు వేసినప్పటి నుంచీ...
అభ్యర్థులు నామినేషన్లు వేసినప్పటి నుంచి ఎన్నికల వ్యయంపై నిబంధనలు అమలవుతాయి. ఖర్చు చేసిన నగదుకు సంబంధించిన వివరాలను అధికారులతో తనిఖీ చేయించుకుంటూ ఉండాలి. ఎన్నికలు ముగిసిన అనంతరం 45 రోజుల్లోపు అభ్యర్థులు ఎవరికి వారు తాము ఖర్చుచేసిన వ్యయానికి సంబంధించిన వివరాలను ఆ గ్రామ పంచాయతీలో తప్పనిసరిగా సమర్పించాల్సి ఉంటుంది. అలా గడువులోపు సమర్పించని పక్షంలో తొలుత నోటీసులు జారీ చేస్తారు. అప్పటికీ స్పందించకుంటే ఎన్నికల్లో గెలిచినా చట్టప్రకారం అనర్హత వేటు పడే అవకాశం ఉంది. ఒకవేళ అతను ఓడినా మరోసారి ఎన్నికల్లో పోటీ చేసేందుకు అనర్హులుగా ప్రకటిస్తారు. అందుకే అభ్యర్థులు ఖర్చుచేసే విషయంలో ఒకటికి రెండుసార్లు ఆలోచించాలి. లెక్కలేనట్లుగా వ్యవహరిస్తే మాత్రం ఇబ్బందులు తప్పవు.
ఇదీ చదవండి: పల్లె పోరు: బరిలో అక్కాచెల్లెలు..నేనున్నానంటూ బంధువు
