రమేష్ కార్డియాక్ మల్టీ స్పెషాల్టీ ఆసుపత్రి ఎండీ డాక్టర్ పీ.రమేశ్బాబు హైకోర్టులో క్వాష్ పిటిషన్ దాఖలు చేశారు. విజయవాడలోని స్వర్ణ ప్యాలెస్ అగ్ని ప్రమాద ఘటన విషయంలో గవర్నర్పేట పోలీసులు తనపై నమోదు చేసిన కేసును కొట్టేయాలని, ఈ వ్యాజ్యం తుది విచారణ తేలేంత వరకు పోలీసులు నమోదు చేసిన కేసులో తదుపరి చర్యలను నిలువరిస్తూ మధ్యంతర ఉత్తర్వులివ్వాలని కోరారు. స్వర్ణ ప్యాలెస్ హోటల్లో కొవిడ్ కేంద్రంలో చికిత్స అందించేందుకు జిల్లా వైద్యాధికారి అనుమతిచ్చినట్లు డాక్టర్ రమేష్ బాబు పిటిషన్లో పేర్కొన్నారు. స్వర్ణ ప్యాలెస్ కొవిడ్ కేంద్రంలో చోటు చేసుకున్న ప్రమాద ఘటనతో తనకు సంబంధం లేదన్నారు . ఈ అంశాలను పరిగణనలోకి తీసుకొని తనపై పోలీసులు నమోదు చేసిన కేసులో తదుపరి చర్యలను నిలువరించాలని అభ్యర్థించారు . నేడు ఈ వ్యాజ్యంపై హైకోర్టు విచారణ జరపనుంది. రమేష్ కార్డియాక్ మల్టీ స్పెషాల్టీ ఆసుపత్రి ఛైర్మన్ సీతారామమోహన్ రావు ఇదే అభ్యర్ధనతో హైకోర్టులో మరో వ్యాజ్యం దాఖలు చేశారు.
ఇదీ చదవండి: 'లంక గ్రామాల ప్రజలు అప్రమత్తంగా ఉండండి'
