రాష్ట్రంలోని 44 వేల ప్రభుత్వ పాఠశాలల్లో సౌకర్యాలు మెరుగుపర్చేందుకు మన బడి నాడు-నేడు అమలు చేస్తున్నామని విద్యాశాఖ మంత్రి ఆదిమూలపు సురేశ్ స్పష్టం చేశారు. విజయవాడలోని సర్వశిక్షా అభియాన్ కార్యాలయంలో పాఠశాలల్లో నాడు-నేడు ద్వారా ఏర్పాటు చేయనున్న మౌలిక సదుపాయాలు, ఇతర ఉపకరణాలను ఆయన పరిశీలించారు. పాఠశాలల్లో 9 అంశాలను మార్పు చేసేందుకు ఉద్దేశించిన నాడు-నేడును త్వరలోనే పూర్తి చేస్తామని మంత్రి వెల్లడించారు. ఉపకరణాల కొనుగోళ్లను ఈ-ప్రొక్యూర్మెంట్ టెండర్ ద్వారా పూర్తి చేశామని మంత్రి తెలిపారు. రివర్స్ టెండరింగ్, జ్యుడీషియల్ ప్రివ్యూ ద్వారా సమీక్ష కూడా పూర్తి అయిందని వెల్లడించారు. ఈ ప్రక్రియ ద్వారా రూ.143 కోట్లు ఆదా అయ్యాయని ఆయన అన్నారు.
కార్పొరేట్ పాఠశాలలకు దీటుగా ప్రభుత్వ పాఠశాలల్లో ప్రమాణాలు పాటిస్తున్నాం. జులై నెలాఖరుకు మొదటి విడతగా 15 వేల పాఠశాలల్లో నాడు-నేడు పనులు పూర్తి అవుతాయి. ఇందుకోసం రూ.710 కోట్లు రివాల్వింగ్ ఫండ్ ఉంచాం. ఇప్పటి వరకు రూ.504 కోట్లు ఖర్చు చేశాం.
-- ఆదిమూలపు సురేశ్, విద్యాశాఖ మంత్రి
ఆగస్టు 3వ తేదీ నుంచి పాఠశాలలు
ఆగస్టు 3వ తేదీన పాఠశాలలు తెరుస్తామని ముఖ్యమంత్రి జగన్ ప్రకటించారని మంత్రి అన్నారు. మరోవైపు పాఠ్యాంశాల్లోని వివిధ అంశాలపై విద్యార్థులకు తలెత్తే సందేహాల నివృత్తి కోసం 1800 123123124 హెల్ప్ లైన్ నంబరును మంత్రి ఆవిష్కరించారు. విశ్వవిద్యాలయాల పరిధిలోని పరీక్షలపై యూజీసీ నిబంధనల మేరకు నిర్ణయం తీసుకుంటామన్నారు. కోర్టు వివాదాలు పరిష్కారమైతే ఉపాధ్యాయుల నియామకాలు త్వరలోనే పూర్తి చేస్తామన్నారు. 10వ తరగతి గ్రేడింగ్పై ఇంకా కసరత్తు చేస్తున్నామని, త్వరలోనే ప్రకటిస్తామని మంత్రి ఆదిమూలపు సురేశ్ తెలిపారు.
ఇదీ చదవండి : ఈఎస్ఐ కేసులో ముగిసిన మూడు రోజుల విచారణ
