'కాపు రిజర్వేషన్​.. ఓట్లు దండుకునే మంత్రదండంగా మారింది'

కాపు రిజర్వేషన్ల అంశాన్ని కొన్ని రాజకీయ శక్తులు.. అవకాశ వాద రాజకీయాల కోసం వాడుకున్నాయని జనసేన అధ్యక్షుడు పవన్​ కల్యాణ్​ ఆరోపించారు. రిజర్వేషన్​ కోరిక ఏళ్లుగా రాజకీయ స్వార్థపరుల గుప్పెట్లో నలిగిపోతున్న కోట్లాది మంది కోరిక అని వ్యాఖ్యానించారు. రిజర్వేషన్ల అంశం.. అధికారంలోకి రావడం కోసం నేతలు చేసే రాజకీయ క్రీడగా మారిందని ఆగ్రహం వ్యక్తం చేశారు. ఇతర కులాలకు నష్టం కలగకుండా కాపులకు రిజర్వేషన్లు కల్పించాలని జనసేనాని డిమాండ్​ చేశారు.

జనసేన పత్రికా ప్రకటన

కాపు రిజర్వేషన్​.. రాజకీయ స్వార్థపరుల గుప్పెట్లో నలిగిపోతున్న కోట్లాది మంది కోరిక అని జనసేన అధ్యక్షుడు పవన్​ కల్యాణ్​ అన్నారు. ఈ మేరకు కాపు రిజర్వేషన్లపై ఓ ప్రకటన విడుదల చేశారు. అవకాశ వాద రాజకీయ శక్తులు రిజర్వేషన్ల కోరికను ఓట్ల సాధనకు వేదికగా మార్చేశాయని ఆగ్రహం వ్యక్తం చేశారు. రిజర్వేషన్ల అంశం.. గత 56 ఏళ్లుగా కాపుల పట్ల కపట ప్రేమను నటిస్తూ.. ఓట్లు దండుకుని అధికారంలోకి రావడం కోసం చేసే రాజకీయ క్రీడగా మారిపోయిందని ధ్వజమెత్తారు. తమకు రిజర్వేషన్​ అమలు చేయాలని కాపులు అడిగినప్పుడల్లా.. ముందు నుంచి సై.. అంటూ వెనుక నుంచి నై.. అంటూ పరోక్షంగా ఇతర వర్గాలను రెచ్చగొడుతూ కాపుల నోట్లో మట్టి కొడుతున్నారని పవన్​ ఆరోపించారు.

మొసలి కన్నీరు కారుస్తున్నారు

2014 ఎన్నికల సమయం నుంచి పాదయాత్ర వరకు కాపులకు రిజర్వేషన్లు ఇస్తామని జపం చేసిన జగన్​ రెడ్డి.. వ్యూహకర్తల బోధనతో కాపులకు రిజర్వేషన్లు ఇచ్చేది లేదని ప్రకటించారని పవన్​ కల్యాణ్​ ఆరోపించారు. కాపుల ఉద్ధరణ అని గొంతు చించుకున్న వైకాపా నేతలు జగన్​ దారిలోనే పయనిస్తూ ఇప్పుడు కాపుల సంక్షేమమంటూ మొసలి కన్నీరు కారుస్తున్నారని ఆగ్రహం వ్యక్తం చేశారు. ఎస్సీ, ఎస్టీ, బీసీలకు ఎలాంటి నష్టం కలగకుండా.. కాపులకు రిజర్వేషన్​ కల్పించాలని జనసేనాని డిమాండ్​ చేశారు.

ఇదీ చూడండి..