గతేడాది వరకు కిలో చిక్కీని ఒకటే ప్యాకింగ్‌తో పాఠశాలలకు అందించేవారు. ఈ ఏడాది ఈ విధానంలో మార్పు చేసి.... ఒక్కో విద్యార్థికి విడిగా ప్యాకింగ్‌తో అందించేలా టెండర్లు పిలిచారు. ప్రభుత్వ, ఎయిడెడ్‌ బడుల్లో చదివే విద్యార్థులకు వారానికి మూడు రోజుల చొప్పున ఒక్కొక్కరికి 25గ్రాముల చిక్కీలను అందిస్తున్నారు. రాష్ట్రాన్ని ఆరు జోన్లుగా విభజించి టెండర్లు నిర్వహించారు. సరాసరిన కిలో చిక్కీకి 158 రూపాయలు చెల్లిస్తున్నారు. దీని ప్రకారం 25గ్రాములు ఉండే చిక్కీకి 3 రూపాయల 95 పైసలు చెల్లిస్తున్నారు. ఇందులోనే 30 పైసల వరకు ప్యాకింగ్‌ ఛార్జీలు కలిపి ఉంటాయి.
రాష్ట్రంలో మధ్యాహ్న భోజనం తినే విద్యార్థులు 42.94లక్షల మంది ఉన్నారు. వీరిలో ప్రతి రోజు 85శాతం పిల్లలు బడికి హాజరవుతుండగా.. వారిలో సరాసరిన 91.5శాతం అంటే.. 33 లక్షల 39 వేల 659 మంది భోజనం తింటున్నారు. వీరికి వారానికి మూడు రోజులు చిక్కీలను అందిస్తున్నారు. ఏడాదికి 220రోజులకు పైగా పాఠశాలలు పని చేస్తాయి. వారానికి మూడు రోజుల చొప్పున సుమారు 110 రోజులు విద్యార్థులకు చిక్కీలు ఇవ్వాల్సి ఉంటుంది. ఈ లెక్కన ఒక్క విద్యా సంవత్సరంలోనే సీఎం బొమ్మతో ప్యాకింగ్‌ చేసి ఇచ్చేందుకు 11.02కోట్లు వ్యయమవుతోందని అంచనా.
గతేడాది చిక్కీల టెండర్లను నాలుగు జోన్లుగా నిర్వహించారు. కిలోకు సరాసరిన 146 చెల్లించగా.. ఈ ఏడాది ఆ ధర కాస్తా 158 రూపాయలకు పెరిగింది. గతేడాది 25గ్రాంలు ఉండే ఒక్కో చిక్కీకి సరాసరిన రూ.3.65 చొప్పున చెల్లించగా.. ఈ ఏడాది రూ.3.95 చెల్లిస్తున్నారు. విడివిడిగా ప్యాకింగ్‌ చేయడంతో 30పైసలు ధర పెరిగినట్లు అధికార యంత్రాంగమే పేర్కొంటోంది. గతేడాది కిలో టెండర్‌ విలువ రూ.135గా నిర్ణయించగా.. ఈసారి దాన్ని రూ.150కి పెంచి టెండర్లు పిలిచారు.
ఇదీ చదవండి: కొత్త జిల్లాలకు కేబినెట్ ఆమోదం.. అవతరణ ముహూర్తం ఇదే!
