రాత్రి ఉండిపోయిన బిర్యానీ, నిన్న మిగిలిన కూర, మొన్న మిగిలిన చారు, వారం క్రితం రుబ్బిన ఇడ్లీ, దోశ పిండి, పప్పులూ, దినుసుల వంటి రకరకాల పదార్థాలతో ప్రతి ఇంట్లోనూ కిక్కిరిసిపోయి ఉంటుంది ఫ్రిజ్. పదార్థాలు పాడవకుండా, చల్లచల్లగా మన డైనింగ్‌టేబుల్‌పైకి తీసుకొస్తున్న ఫ్రిజ్ మన జీవితాల్లో భాగమవడానికి కారణం ఫ్లోరెన్స్‌ పార్పార్ట్‌. తనింట్లో మిగిలిపోయిన పదార్థాలు నిల్వ ఉండక పాడవుతూ తరచూ పడేయాల్సి రావడంతో ఆ సమస్యని అధిగమించడానికి ఫ్లోరెన్స్‌ 1914లో ఫ్రిజ్‌కి రూపకల్పన చేసి దానికి పేటెంట్‌ పొందింది. అంతకుముందు వీధులు ఊడ్చే యంత్రాన్నీ రూపొందించిందామె.
డయపర్:
నేటి తల్లులు డయపర్‌లు లేని ప్రపంచాన్ని అసలు ఊహించలేరు. అవి మనదేశంలోకి రాకముందు తరచూ పిల్లల తడి బట్టలు మారుస్తూ... వాటిని ఉతుకుతూ ఎంతో శ్రమపడేవారు. ఒకప్పుడు ఆ కష్టాలన్నీ పడిన మారియాన్‌ దోనోవాన్‌ వాటికి పరిష్కారంగా డయపర్లను కనిపెట్టింది. స్నానాల గదిలో వాడే షవర్‌ కర్టెన్‌లో కొంత భాగాన్ని తీసి తన దగ్గరున్న కుట్టుమిషన్‌ సాయంతో ‘వాటర్‌ప్రూఫ్‌’ డ్రాయర్‌గా కుట్టింది. ముందు తన పాపకే వాడి చూసి.. దానివల్ల ఇబ్బందులేమీ లేవని నిర్ధారించుకుంది. దానికి ‘బోటర్‌’ అని పేరుపెట్టి పేటెంట్‌ కూడా తీసుకుంది. ఇప్పుడవే అప్‌డేట్‌ అయి ఎప్పటికప్పుడు సరికొత్తగా మార్కెట్‌లోకి వస్తున్నాయి.
డిష్‌వాషర్‌:
జోసెఫిన్‌ కాక్రేన్‌... డిష్‌వాషర్‌ సృష్టికర్త. జోసెఫిన్‌ భర్త విలియం కాక్రేన్‌ కోటీశ్వరుడు. వాళ్లింట్లో తరచూ ఏదో ఒక పార్టీ జరుగుతూనే ఉండేది. ఆ పార్టీలో జోసెఫిన్‌ ఇంట్లో ఉన్న చైనా పింగాణీ పాత్రల్లోనే వడ్డించేది. అలానే పార్టీ అయ్యాక ఆ పాత్రలన్నీ శుభ్రం చేసి జాగ్రత్త చేయాల్సిన బాధ్యత కూడా జోసెఫిన్‌దే. దాంతో ఆమె చాలా ఇబ్బంది పడేది. అందుకే ఆ పనిని కాస్త సులువు చేయాలనే లక్ష్యంతో డిష్‌వాషర్‌కి రూపకల్పన చేసింది. మొదట్లో తన కోసమే దీన్ని తయారు చేసుకున్నా... తరవాత దాన్నే వృత్తిగా ఎంచుకుని గారిసన్‌- కాక్రేన్‌ పేరుతో కంపెనీ పెట్టి ఎంతోమంది మహిళలకి డిష్‌వాషర్లను పరిచయం చేసింది.
హీటర్:
చలికాలంలో స్నానానికి పొగలు కక్కే వేణ్నీళ్లు ఉండాల్సిందే, లేకపోతే చలికి తట్టుకుని స్నానం చేయడం కష్టమే. మరి ఆ వేణ్నీళ్ల కోసం గీజర్‌ పెట్టించుకునే స్తోమత అందరికీ ఉండదు. అదే హీటర్ అయితే చౌకగా దొరుకుతుంది. ఇట్టే నీళ్లు కాచుకోవచ్చు. మరి మధ్యతరగతి వాళ్లకి ఎంతో ఉపయుక్తమైన ఈ హీటర్‌ని ఐదా ఫోర్బ్స్‌ 1917లోనే కనిపెట్టింది. చన్నీళ్ల స్నానంతో ఎన్నో ఇబ్బందులు ఎదుర్కొన్న ఐదా ఎలక్ట్రికల్‌ వాటర్‌ హీటర్‌ని ఆవిష్కరించింది. అప్పట్లో అది కాస్త పెద్ద సైజులో ఉండేది. ఇప్పుడదే రూపు మారి చాలా చిన్నపరిమాణంలో మార్కెట్‌లోకి వచ్చింది.
చెత్తబుట్ట:
లిలియన్‌ గిల్బర్త్‌కి ఒక్కరు కాదు ఇద్దరు కాదు ఏకంగా 11 మంది పిల్లలు. అంతమంది పడేసే, పాడుచేసే వస్తువులని ప్రతిసారీ చెత్త బుట్టలో వేయడం.. మళ్లీ వాటిని పిల్లలు అందుకోకుండా చూసుకోవడంతో లిలియన్‌కి తలప్రాణం తోకకొచ్చేది. ఆ శ్రమ నుంచి తప్పించుకోవడం కోసమే కాలితో నొక్కితే మూత తెరుచుకునే ఫుట్‌ పెడల్‌ చెత్త బుట్టను తయారు చేసిందామె.
మందుబిళ్ల కంటే వేగంగా జబ్బు నయం చేసే సూది మందును తీసుకొచ్చింది లెటీటియా గీర్‌ అనే నర్సు. అంతకు ముందు రూపొందించిన సిరంజి ఉపయోగించడం కష్టంగా ఉండేది. దాంతో లెటీటియా ఒంటిచేత్తో తేలిగ్గా వాడే సిరంజిని తయారు చేసి పెటెంట్‌ పొందింది. వీటితోపాటు కాఫీ ఫిల్టర్‌, సీసీటీవీ కెమెరాలు, వైట్‌నర్‌ వంటివెన్నో మహిళల చేతుల్లో రూపుదిద్దుకున్నాయి.
ఇదీ చదవండి: క్రీడల్లో యువ మహిళా కెరటాలు..
