తెలంగాణ రాష్ట్రం కుమురం భీం ఆసిఫాబాద్ జిల్లాలో మనుషులను చంపుతున్న పెద్దపులి వేట కోసం అధికారులు సన్నద్ధమవుతున్నారు. దీనిని బోనులో బంధించేందుకు అటవీశాఖ ఆరు వారాలుగా చేస్తున్న ప్రయత్నాలు ఫలించలేదు. మేకలు, దూడలను బోన్లలో ఉంచి అధికారులు ఎరవేసినా.. అక్కడివరకు వస్తున్న పెద్దపులుల ఆపదను పసిగట్టి పక్కనుంచి వెళుతున్నట్లు సమాచారం.
దీంతో మహారాష్ట్ర అటవీశాఖ సూచనల మేరకు మత్తుమందు ప్రయోగం (ట్రాంక్విలైజ్‌) ద్వారా చేసి పట్టుకునేందుకు తెలంగాణ అటవీశాఖ సిద్ధం అవుతోంది. ఈ మేరకు తెలంగాణ చీఫ్‌ వైల్డ్‌లైఫ్‌ వార్డన్‌ తాజాగా అనుమతించారు. పెద్దపులి ఏదైనా పశువును చంపినప్పుడు మాంసాన్ని ఒకేసారి తినేయదు. సగం తిని రెండోసారి మళ్లీ వస్తుంది. ఆ సమయానికల్లా అక్కడ మాటువేసి ట్రాంక్విలైజ్‌ చేయాలని అటవీశాఖ నిర్ణయించింది. దీనికోసం నాలుగు ట్వ్రాంక్వి గన్లను సిద్ధం చేసినట్లు అటవీశాఖ అధికారి ఒకరు తెలిపారు. వెటర్నరీ వైద్యులు వరంగల్‌కు చెందిన డాక్టర్‌ ప్రవీణ్‌కుమార్‌, హైదరాబాద్‌కు చెందిన డాక్టర్‌ నవీన్‌కుమార్‌లను అందుబాటులో ఉండాలని కోరింది.
ఏనుగులపై వెళ్లి..
పులిని త్వరగా పట్టుకోవాలంటే.. అది ఉన్నచోటుకే వెళితేనే ఫలితం ఉంటుందని నిపుణులు చెబుతున్నారు. ‘పశువుల్ని చంపిన చోటనే పులిని పట్టుకోవాలంటే చాలా రోజులు పడుతుంది. మత్తుమందు ప్రయోగించినా 15-20 నిమిషాల తర్వాతగానీ పులి స్పృహ కోల్పోదు. ఈలోగా కోపంతో దాడి చేయొచ్చు. ఇలాంటప్పుడు ప్రాణాలు కాపాడుకోవాలంటే పులికి అందనంత ఎత్తులో ఉండాలి. ఏనుగులపై కూర్చుంటే పులి దగ్గరికే వెళ్లి, ట్రాంక్విలైజ్‌ చేయొచ్చు. తమిళనాడు, మధ్యప్రదేశ్‌ వంటి రాష్ట్రాల నుంచి తెప్పించాలి’ అని ‘వైల్డ్‌లైఫ్‌ ట్రాంక్యూఫోర్స్‌’ సంస్థ కార్యదర్శి నవాబ్‌ షఫత్‌ అలీఖాన్‌ సూచించారు.
విడతల వారీగా దుప్పులు
మరోవైపు పులుల ఆకలి తీర్చడానికి అవి అధికంగా తిరిగే కాగజ్‌నగర్‌ అటవీ డివిజన్‌కు 200-300 చుక్కల దుప్పులను తరలించేందుకు అటవీశాఖ ఆదేశాలు జారీ చేసింది. వేటాడి ఆకలి తీర్చుకునేందుకు శాకాహార జంతువుల కొరత ఉండటంతో.. పెద్దపులులు ఆ ప్రాంతంలో పశువులను చంపుతున్నాయి. తాజాగా మనుషులపైనా దాడులకు దిగుతుండటంతో అటవీశాఖ ఈ నిర్ణయం తీసుకుంది. హైదరాబాద్‌లోని జూపార్కు సహా శామీర్‌పేట, మహావీర్‌ హరిణ వనస్థలి జాతీయవనం నుంచి దుప్పుల్ని అటవీ ప్రాంతానికి తరలిస్తారు. జూపార్కు, హరిణ వనస్థలి, శామీర్‌పేట నుంచి దుప్పుల్ని కాగజ్‌నగర్‌ టైగర్‌ కారిడార్‌కు విడతల వారీగా పంపనున్నట్లు అటవీశాఖ వర్గాల సమాచారం. 12 పెద్దపులులు ఉన్న కాగజ్‌నగర్‌ అటవీ డివిజన్‌లో 4-7వేల వరకు శాకాహార జంతువులు ఉండాలి. ఇప్పుడు 2,700 మాత్రమే ఉండటంతో.. పెద్దపులులు ఆకలితో అలమటిస్తున్నాయి. తాజాగా తీసుకెళ్లి వదిలే దుప్పులతో ఆకలి సమస్య కొంతమేర తీరుతుందని అటవీశాఖ భావిస్తోంది.
సరిహద్దులో మరో అభయారణ్యం
- మహారాష్ట్ర సర్కారు నిర్ణయం
తెలంగాణ- మహారాష్ట్ర సరిహద్దున ఉన్న గోండ్‌ పిప్రి, రాజురా, బల్లార్ష, కోసార అటవీ ప్రాంతాల పరిధిలో కన్నడ్‌ఘవ్‌ పులుల అభయారణ్యాలను ఏర్పాటు చేయాలని పొరుగునున్న మహారాష్ట్ర సంకల్పించింది. తరచూ ఈ ప్రాంతంలో పులులు మనుషులను చంపడం, అవికూడా వివిధ ప్రమాదాల్లో, వేటగాళ్ల చేతిలో బలవ్వడం విదితమే. పులులతో పాటు, ప్రజల పరిరక్షణే ధ్యేయంగా మహారాష్ట్ర ప్రభుత్వం ఈ నిర్ణయం తీసుకుంది. దీనిపై ఇటీవల తెలంగాణ- మహారాష్ట్ర అటవీ అధికారులు సమావేశమయ్యారు.
కుమురం భీం జిల్లాలో వాంకిడి, సిర్పూర్‌(టి), కౌటాల, బెజ్జూర్‌, చింతలమానేపల్లి, దహెగాం మండలాల శివారు ప్రాంతంలో పెన్‌గంగ, ప్రాణహిత నదులు ప్రవహిస్తున్నాయి. ఈ నదుల అవతలి ఒడ్డున మహారాష్ట్ర గ్రామాలు, ఇవతల తెలంగాణకు చెందిన గ్రామాలు ఉన్నాయి. సిర్పూర్‌(టి) మండల కేంద్రం నుంచి అయిదు కిలోమీటర్లు ప్రయాణిస్తే ఫొడ్సా గ్రామ అటవీ ప్రాంతం వస్తుంది.
ప్రాణహిత, పెన్‌గంగ పరివాహక ప్రాంతాల నుంచి పులులు తాడోబా నుంచి కాగజ్‌నగర్‌ కారిడార్‌ మీదుగా పెంచికల్‌పేట్‌, దహెగాం, బెజ్జూర్‌ అడవులకు రాకపోకలు సాగిస్తున్నాయి. మహారాష్ట్ర చంద్రపూర్‌ జిల్లాలో రాష్ట్ర వన్యజీవ మండలి సమావేశంలో అధికారులు కొత్తగా పులుల అభయారణ్యం ఏర్పాటు చేయాలని తీర్మానించారు. ఇక నేషనల్‌ టైగర్‌ కన్జర్వేటర్‌ అథారిటీ(ఎన్‌టీసీ) అనుమతులు రావడమే మిగిలింది. అభయారణ్యం పరిధిలో 18 పంచాయతీలకు చెందిన 33 గ్రామాలు ఉన్నాయి. సుమారుగా 15 వేల మంది జీవిస్తున్నారు. ఇక్కడి ప్రజలను తరలించాలని అధికారులు నిర్ణయించారు. ఇందుకు వారు వ్యతిరేకంగా ఉన్నారని సమాచారం.
ఇదీ చూడండి: పదో తరగతిలో 6 ప్రశ్నపత్రాలే...పెరగనున్న పరీక్ష సమయం...?
